Анжаліку Мельнікаву неаднаразова бачылі ў Мінску гэтай зімой і вясной

Зніклую экс-спікерку Каардынацыйнай рады Анжаліку Мельнікаву неаднойчы бачылі ў Мінску цягам зімы–вясны бягучага года. Пра гэта Еўрарадыё распавялі дзве не звязаныя паміж сабой крыніцы.

Адна з іх не стала пераказваць дэталі сустрэчы, бо баіцца за сваю бяспеку. Іншая ж бачыла былую дзяячку дэмакратычных сіл у сакавіку 2026 года ў мацоўні GYM24 каля станцыі метро “Усход”. Была нават спроба яе лепей разгледзець, але адна з трэнерак залы без тлумачэнняў не дазволіла да Мельнікавай наблізіцца. З той жа мацоўні некалькі тыдняў таму з’явілася фота Мельнікавай.

Ініцыятыва BELPOL адмовілася пракаментаваць Еўрарадыё версію, што Анжаліка Мельнікава знаходзіцца ў Беларусі, але пад поўным кантролем з боку КДБ. 

“Нам адказаць няма чаго. Нам усё роўна, там яна ці не”, — зазначыў прадстаўнік арганізацыі Уладзімір Жыгар.

Кіраўнік ініцыятывы BYPOL і польскай дэтэктыўнай агенцыі “Рэкс” Аляксандр Азараў таксама не стаў нічога каментаваць, хоць бачыў паведамленне ад журналіста Еўрарадыё.

Адзначым, што “выпадковае” фота з Мельнікавай, як і яе “выпадковыя выхады ў горад”, з’явілася толькі пад кампанію перад выбарамі ў Каардынацыйную раду. У 2025 годзе, восенню і зімой, яе ніхто не бачыў. Не выключана, што яе спецыяльна “зліваюць” у інфармацыйнае поле дзеля дыскрэдытацыі дэмсіл і асабліва КР.

Гісторыя знікнення Мельнікавай

Спікерка Каардынацыйнай рады і прадстаўніца Народнага антыкрызіснага ўпраўлення Анжаліка Мельнікава пакінула Польшчу ў сакавіку 2025 года, пераляцеўшы на востраў Шры-Ланка, а адтуль у Дубай, дзе яе сляды зніклі. Перад сваім знікненнем яна (сама ці пад ціскам) зняла з рахункаў свайго фонду каля 150 тысяч долараў, якія пазней былі выведзены на іншыя рахункі. 

Праз год пасля знікнення з’явіліся яе фота, нібыта зробленыя ў новай сталічнай трэнажорнай зале GYM24 каля станцыі метро “Усход”. Таксама яе прысутнасць у Мінску пацвердзіў журналістам “Нашай Нівы” бацька Мельнікавай, аднак дадаў, што патэлефанаваць дачцэ не можа: гэта робіць яна сама з закрытага нумара. “Зеркало” паведамляла, што на імя Анжалікі былі набыты дзве дарагія кватэры ў Мінску