Арыштаванага ў Мінску Баўмгертнера ў Расіі ўключылі ў спіс кандыдатаў
Савет дырэктароў расійскай кампаніі "Уралкалій" унёс прозвішча гендырэктара ў лік 11 чалавек, якія могуць увайсці ў новы савет дырэктароў.
Разам з Уладзіславам Баўмгертнерам у спісе кандыдатаў знаходзіцца цяперашні старшыня савета дырэктароў Аляксандр Валошын.
Нагадаем, кіраўніка "Уралкалія" Уладзіслава Баўмгертнера затрымалі 26 жніўня ў мінскім аэрапорце пасля сустрэчы з прэм'ерам Міхаілам Мясніковічам. Следчы камітэт Беларусі заявіў, што гендырэктар “Уралкалія” нанёс шкоду нацыянальным інтарэсам Беларусі. Баўмгертнеру было выстаўленае абвінавачанне ва злоўжыванні ўладай і службовымі паўнамоцтвамі. Следчы камітэт паведаміў, што страты па справе Беларускай калійнай кампаніі ацэньваюцца на 100 млн долараў. Пазней гендырэктару "Уралкалія" змянілі артыкул абвінавачання, цяпер яго падазраюць у крадзяжы.
Баўмгертнер месяц знаходзіўся ў следчым ізалятары КДБ, а пасля быў пераведзены пад хатні арышт на здымнай кватэры ў Мінску. Матэрыялы па яго справе, перададзеныя ў Расію, склалі 19 тамоў.
Фота — ria.ru
