Беларуса затрымалі ў Польшчы па запыце з Мінска: што вядома пра інцыдэнт
Макар Малахоўскі / фота з сацсетак
Беларус Макар Малахоўскі быў затрыманы ў Польшчы па запыце беларускага боку.
Затрыманне адбылося ў кватэры, дзе жыў Малахоўскі, у горадзе Пясэчна (Мазавецкае ваяводства) 12 верасня. Мужчына прыехаў у Польшчу ў лістападзе 2020 года па гуманітарнай візе і хаваўся тут ад пераследу ў Беларусі.
Пра гэта на сваёй старонцы ў Facebook паведаміў кіраўнік Беларускага дома ў Варшаве Алесь Зарэмбюк.
Як паведамляе Еўрарадыё, Малахоўскі знаходзіўся ў спісе вышуку Інтэрпола. Ён затрыманы на 48 гадзін, да яго цяпер накіроўваецца рускамоўны адвакат. У панядзелак Малахоўскага даставілі ў раённую пракуратуру Варшавы, якая займаецца яго справай.
Макар Малахоўскі — сын святара Андрэя Малахоўскага, клірыка Свята-Елісавецінскага манастыра ў Мінску. Па дадзеных СМІ, у Беларусі супраць Макарыя распачатая крымінальная справа па арт. 364 КК (гвалт або пагроза гвалту ў дачыненні да супрацоўніка міліцыі).
