Беларускае медзведзяня адправілі на рэабілітацыю ў Румынію
Медзведзяня перад адпраўкай у рэабілітацыйны цэнтр / minpriroda.gov.by
Беларускае медзведзяня адправілі ў рэабілітацыйны цэнтр для мядзведзяў-сірот "Bear Again" у Румынію. Пра гэта гаворыцца ў паведамленні прэс-службы Міністэрства прыродных рэсурсаў і аховы навакольнага асяроддзя.
Медзведзяня знайшлі адно ў лесе, маці побач не было. Самастойна гэтыя звяры могуць жыць з двух гадоў, таму яго вырашылі адлавіць. Часова яго змясцілі ў Мінскі заапарк.
Паколькі мядзведзі ўнесеныя ў Чырвоную кнігу Беларусі і маюць ахоўны статус, "для нас вельмі важна, каб кожная асобіна была вернутая ў дзікае асяроддзе", адзначылі ў Мінпрыроды. У выніку спецыялісты знайшлі румынскі цэнтр для мядзведзяў-сірот і спонсара, які дапамог ажыццявіць перавозку медзведзяняці. З грашыма дапамагло брэсцкае прадпрыемства "Санта-Брэмар".
У выніку 17 лістапада беларускае медзведзяня шчасліва выпусцілі ў дзікае асяроддзе на тэрыторыі "Bear Again". Яго чакае рэабілітацыя. Мяркуецца, што праз два гады мядзведзя вернуць дадому, каб пусціць у дзікае асяроддзе на тэрыторыі ўжо аднаго з беларускіх запаведнікаў.
