Беларускі ўрад разглядае праект указа аб павышэнні дапамогі па беспрацоўі
Беларускі ўрад разглядае праект указа аб павышэнні дапамогі па беспрацоўі. Пра гэта паведаміў начальнік упраўлення палітыкі занятасці Міністэрства працы і сацыяльнай абароны Алег Такун. Паводле яго слоў, павышэнне дапамог закране толькі дзве катэгорыі грамадзян.
Першая — тыя, хто звольнены ў сувязі са скарачэннем лішняй колькасці работнікаў або ліквідацыяй прадпрыемства. Прапануецца ім устанавіць дапамогу па беспрацоўі ў памеры 100% бюджэту пражытачнага мінімуму (з 1 лістапада БПМ у сярэднім на душу насельніцтва складае 174,52 рубля). Другая — тыя, хто па аб`ектыўных уважлівых прычынах аказаліся без працы (напрыклад, у сувязі са сканчэннем тэрміну кантракту). Ім прапануецца плаціць дапамогу па беспрацоўі ў памеры 50% БПМ.
Міністэрства працы спадзяецца, што праект будзе падтрыманы. Алег Такун паведаміў, што "ёсць даручэнне ўрада аб распрацоўцы доўгатэрміновай стратэгіі па ўкараненні з 2018 года абавязковага страхавання па беспрацоўі". Ён нагадаў, што ў Мінпрацы ёсць афіцыйная рабочая група, прысвечаная гэтаму пытанню. Прапановы, якія датычацца страхавання па беспрацоўі, збіраюцца перадаць ва ўрад да пачатку лютага 2017 года, інфармуе БелаПАН.
Паводле афіцыйных дадзеных, колькасць зарэгістраваных беспрацоўных на канец верасня 2016 года склала 40,3 тысячы чалавек. Сярэдні памер дапамогі па беспрацоўі складае каля 27 дэнамінаваных рублёў (гэта каля 13,5 долара).
