Былая каманда TUT.by стварыла сайт Zerkalo.io

Былая каманда TUT.by, якая засталася на волі, стварыла сайт Zerkalo.io. "Мы працягнем публікаваць самыя важныя навіны грамадска-палітычнага жыцця Беларусі", — гаворыцца ў заяве. Таксама будуць асвятляцца надзённыя праблемы людзей: "ад адключэння гарачай вады... да чэргаў і судоў".

Паведамляецца, што сацсеткі TUT.by стануць сацсеткамі Zerkalo.io, а з часам памяняюць назву.

"Zerkalo.io скончыць сваё існаванне ў той дзень, калі TUT.by зможа легальна аднавіць сваю паўнавартасную працу ў Беларусі з усім архівам публікацый, — пішуць супрацоўнікі выдання. — Калі гэта адбудзецца, мы не ведаем. Але мы верым".

З 18 траўня доступ да партала TUT.by у Беларусі быў абмежаваны. У рамках крымінальнай справы аб "нявыплаце падаткаў" затрымалі паўтара дзясятка супрацоўнікаў, яны прызнаныя палітвязнямі. Міністэрства ўнутраных спраў прапануе, каб сайт, сацсеткі і ўсе матэрыялы партала прызналі экстрэмісцкімі.