Чорны чацвер для СМІ: як нашы калегі перажылі гэты дзень

Раніца для журналістаў і іх чытачоў пачалася з перабояў працы сайта выдання "Наша Ніва". За гэтым рушыла ўслед чарада ператрусаў, допытаў і затрыманняў.

Сілавікі прыходзілі не толькі да журналістаў, якія жывуць і працуюць у Мінску. Абшуквалі і рэдакцыі регіянальных СМІ.

Расказваем, як нашы калегі пражылі гэты дзень.

Мінск

Трое супрацоўнікаў "Нашай Нівы" — галоўны рэдактар Ягор Марціновіч, кіраўнік аддзела маркетынгу і рэкламы Андрэй Скурко, галоўны бухгалтар выдання Вольга Раковіч — былі затрыманыя на 72 гадзіны і дастаўленыя ў ІЧУ на Акрэсціна. Затрыманы быў таксама галоўны рэдактар часопіса "Наша гісторыя" і рэдактар дзіцячых беларускамоўных часопісаў Андрэй Дынько.

Яны праходзяць падазраванымі па ч. 1 арт. 342 Крымінальнага кодэкса Рэспублікі Беларусь. У гэтым артыкуле ідзе гаворка пра дзеянні, якія "груба парушаюць грамадскі парадак".

Брэсцкая вобласць

Ператрусы прайшлі ў шэрагу рэгіянальных выданняў у Брэсцкай вобласці. Сярод іх — рэдакцыя выдання Media-Polesye.by. Падрабязнасці і прычыны ператрусу пакуль невядомыя. Баранавіцкае выданне Intex-Press паведаміла, што сілавікі прыйшлі ў рэдакцыю "Брестской газеты". Праз 15 хвілін у сацсетках баранавіцкіх журналістаў ужо з'явілася публікацыя пра тое, што ў іх таксама праходзіць ператрус.

Віцебская вобласць

У Віцебскай вобласці таксама не было спакойна. У самім абласным цэнтры прайшоў ператрус у кватэры журналіста-фрылансера Змітра Казакевіча. Ператрус праводзілі на падставе крымінальнай справы аб паклепе на супрацоўніка міліцыі. Забралі ноўтбукі жонкі і дачкі Казакевіча, два старыя сістэмныя блокі, два фотаапараты і маленькі бел-чырвона-белы сцяжок.

А журналіст з Глыбокага Зміцер Лупач з'ехаў з сілавікамі на ператрус проста з санаторыя "Пліса", у якім адпачываў. Абшукалі і дом маці віцебскага журналіста Вячаслава Лазарава. Самога журналіста не знайшлі, але канфіскавалі ў жанчыны тэлефон.

Магілёўская вобласць

Ператрус таксама прайшоў у журналісткі Алесі Лацінскай, якая супрацоўнічае з бабруйскім выданнем bobr.by. Пасля ператрусу дзяўчыну павезлі на размову ў КДБ. Пасля размовы яе адпусцілі, узяўшы падпіску аб неразгалошванні. Журналістка не гаворыць, ці ёсць у яе які-небудзь працэсуальны статус, піша БАЖ.

Не толькі журналісты

Гэты чацвер быў складаным не толькі для прадстаўнікоў медыясферы. У Брэсце затрымалі актывістку Аляксандру Гаўрусік. Яе даставілі ў ІЧУ.

Сёння была затрыманая таксама студэнтка Полацкага дзяржаўнага ўніверсітэта Ганна Багданава. Раней дзяўчына звярталася з відэазваротам, у якім асудзіла гвалт. Яна таксама паўдзельнічала ў флэшмобе "На што ты здольны дзеля мары" — пастрыглася нагала ў знак салідарнасці са студэнтамі-палітвязнямі.

Быў затрыманы экс-кіраўнік АГП Васіль Палякоў. Ён праходзіць падазраваным па крымінальным артыкуле, звязаным з тэрарызмам. Пра гэта ён паведаміў сваёй жонцы, калі атрымаў магчымасць патэлефанаваць. Палітыка адправілі ў ІЧУ.

Мы спадзяёмся, што гэта ўсе дрэнныя навіны на сёння.