Пасля першаснай (так называецца першы курс, гэта значыць, першыя два ўколы) вакцынацыі шмат сталі казаць пра бустарныя вакцыны (або рэвакцынацыю) — і агітаваць зрабіць гэта. Але ад старту пандэміі каранавіруса прайшло ўжо тры гады, шмат у каго з'яўляецца пытанне: ці прыйшла пара рабіць ужо трэці, чацвёрты ці нават пяты бустар вакцыны? Адказваем са спасылкай на экспертаў па ахове здароўя і СААЗ.
Калі коратка: не, вам не абавязкова пастаянна рабіць рэвакцынацыю ад каранавіруса.
Калі падрабязней: СААЗ зараз рэкамендуе рабіць паўторны бустар праз паўгода пасля першага толькі людзям з групы рызыкі (пажылым, а таксама тым, у каго ёсць імунадэфіцыт). Усім астатнім, на думку спецыялістаў Сусветнай арганізацыі аховы здароўя, наноў рабіць ўколы неабавязкова — але і не пашкодзіць.
Трохі іншы падыход у Амерыканскага цэнтра па кантролі і прафілактыцы захворванняў (CDC): пажылым у ЗША рэкамендуюць рабіць яшчэ адзін бустар як мінімум праз чатыры месяцы, а людзям з аслабленым імунітэтам — кожныя два месяцы. Усім астатнім, як і ў рэкамендацыях СААЗ, ізноў рабіць прышчэпкі неабавязкова.
Зрэшты, аўстралійскі прафесар-эпідэміёлаг Тоні Блэйклі ў каментары ABC адзначыў: часам рабіць бустар варта і людзям па-за зонай рызыкі. Сапраўды, для іх узроўні рызыкі ўжо не такія вялікія, але так папуляцыйная абарона ўвогуле будзе вышэйшая.
Калі вы не ўпэўненыя, ці варта вам рэвакцынавацца, адзіны правільны варыянт: параіцца з лекарам. Калі вы не хочаце ісці ў паліклініку або прыватны медцэнтр, можаце звярнуцца да спецыялістаў праз сэрвіс Фонду медыцынскай салідарнасці "еЗдароўе".
