Даносы ў духу 1937-га і камбайнер з БЧБ-сцягам: узлом базы дзяжурнай службы 102
Шар белага колеру, які выклікае падазрэнні, — гэта яшчэ "кветачкі" / Еўрарадыё
19 верасня хакерская групоўка "Кібер-Партызаны" апублікавала звесткі ўзламанай, па іх сцверджанні, базы звестак выклікаў службы 102. Цяпер на адпаведным сайце з прывязкай да месца жыхарства і пазначэннем нумароў тэлефонаў нанесеныя звесткі пра "даносчыкаў-калабарантаў", якія тэлефанавалі ў міліцыю са скаргамі на пратэстоўцаў і развешаную БЧБ-сімволіку.
Згодна са злітымі "Кібер-Партызанамі" звесткамі, служба 102 зафіксавала вялікую колькасць такіх званкоў — ад кур'ёзных да амаль што "сталінскіх" даносаў на суседзяў. Вось некаторыя з іх, глядзіце самі.
Флэшбэкі з 1937-га
Паведамленні ў 102 ад "неабыякавых грамадзян" нагадваюць рэпрэсіўны 1937 год: тыя, хто тэлефануе, закладваюць суседзяў, калег і нават блізкіх сваякоў, якія маюць іншую грамадзянскую пазіцыю.
"Пільныя беларусы" паведамляюць міліцыі імёны, прозвішчы і пакідаюць нумары тэлефонаў "нядобранадзейных" грамадзян і арганізацый. А калі "правапарушальнік" невядомы, то тыя, хто тэлефануе, паказваюць на падазраванага імі чалавека — ну чым не класічны сталінскі данос?
"Дзяўчына ў бронекамізэльцы будзе правакаваць АМАП на бойку"
"Дзяўчаты ў міліцэйскіх бронекамізэльках", "перакульваюць аўтобус з выбарчай камісіяй" і іншыя падобныя паведамленні таксама заслугоўваюць асобнай увагі. Жнівень-2020 быў жыватворнай глебай для ўражлівых прыхільнікаў дзейных уладаў.
"Лялькаводы" з польскімі, бел-чырвона-белымі і вясёлкавымі сцягамі
Кур'ёзных званкоў ад "пільных грамадзян" таксама было нямала. Вось некаторыя з іх:
А гэта паведамленне прэтэндуе, мабыць, на першае месца ў намінацыі "Самы драматычны сюжэт":
У Навагрудку да пратэстоўцаў прыбыла падмога — ці то крыжакі, ці то Ку-клукс-клан.
У адным з мінскіх двароў — не, ну вы толькі ўявіце сабе! — людзі спявалі песні на беларускай мове.
Заяўнікі не абышлі ўвагай і BSB Банк. Магчыма, таму, што ў банка лагатып складаецца з бела-чырвонай каляровай гамы.
Еўрарадыё не займалася дэталёвым аналізам сотняў выкладзеных скаргаў на "пратэстуноў": на сённяшні дзень "Кібер-Партызанамі" апублікавана 2842 такія заявы. Па словах хакераў, гэта толькі "першая партыя калабарантаў, па чыіх даносах людзей затрымлівалі і збівалі ў жніўні — верасні 2020-га".
