Два зарапады можна будзе ўбачыць з Беларусі ў снежні

Адразу два зарапады змогуць убачыць беларусы ў снежні (калі пашчасціць).

У сярэдзіне месяца з 13 на 14 снежня з паўночнага паўшар'я можна будзе назіраць за Гемінідамі. Метэорны паток з сузор'я Блізнятаў будзе моцным: у гадзіну будзе ляцець да 120 метэораў. На жаль, бачнасць будзе не вельмі: месяц будзе набліжацца да поўні, і яго яркае святло перашкодзіць назіральнікам за "падаючымі зоркамі".

Усяго праз тыдзень па небе будуць ляцець Урсіды. Гэта зарапад з сузор'я Малая Мядзведзіца. Яго чакаюць з 21 на 22 снежня. Пры Урсідах па небе будзе пралятаць ўсяго да 10 метэораў у гадзіну. І назіранням за гэтымі метэорамі таксама можа перашкодзіць месяц.

Дарэчы, у Беларусі ёсць прафесійныя назіральнікі за зоркамі, якія робяць фантастычныя здымкі начнога неба. Адзін з такіх здымкаў нават стаў "фатаграфіяй дня" NASA. Праўда, зроблены ён не ў Беларусі. На здымку Дзмітрыя Канановіча можна ўбачыць начное неба над заснежанымі Альпамі, і ў гэтым цёмным небе бачная вялікая спіральная галактыка — гэта галактыка Андрамеды.