Дырэктар "Атланта" сустрэўся з Калеснікавай і паабяцаў не звальняць страйкоўцаў

Рабочыя завода халадзільнікаў "Атлант" паведамляюць, што на іх ціснуць, таму яны асцерагаюцца выходзіць на страйк. Да прахадной выйшлі толькі некалькі работнікаў.

Каля прадпрыемства стаіць група падтрымкі страўкоўцаў — у ёй некалькі дзясяткаў чалавек. Падтрымаць іх прыехала Марыя Калеснікава — прадстаўніца аб'яднанага штаба Святланы Ціханоўскай. Яна правяла перамовы з дырэктарам "Атланта" Дзмітрыем Сакалоўскім. Ён выйшаў да пратэстоўцаў і заявіў, што на тэрыторыі прадпрыемства ў працоўны час абмяркоўвае толькі працоўныя пытанні. 

Тым не менш Сакалоўскі публічна паабяцаў не звальняць страйкоўцаў. "Усё, што робіцца на тэрыторыі ЗАТ "Атлант", будзе ў рамках заканадаўства", — заявіў ён. 

Гендырэктар завода таксама заявіў, што прадпрыемства працуе і рабочым ніхто не забараняе выйсці на акцыю пратэсту.

Палітычныя страйкі адбываюцца на шэрагу беларускіх прадпрыемстваў ужо з пятніцы, 14 жніўня. 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.