Дзеля ЧС па футболе заўзятар пераплыў на лодцы акіян
Рыкарда Дзініш даплыў ад Лісабона да бразільскага Сальвадора, каб паглядзець матч сваёй зборнай супраць немцаў.
На гэта яму спатрэбілася больш за 40 дзён, піша ІТАР-ТАСС.
Гэтая ідэя ўзнікла ў Рыкарда Дзініша ў лістападзе мінулага года падчас зваротнага стыкавага матчу за права згуляць на чэмпіянаце свету, у якім партугальцы сустракаліся са шведамі.
"Усё складалася не на карысць нашай зборнай, і я паабяцаў у адзіночку даплыць да Бразіліі, калі мы патрапім на чэмпіянат свету", — цытуюць словы Дзініша.
У падарожжа Дзініш узяў з сабой котку. "За гэты час шмат чаго давялося перажыць. Часам было вельмі прыгожа, але часам прыходзілася вельмі цяжка. Былі моманты, калі я плакаў ад адчаю і не ведаў, што рабіць. Таксама мне давялося спраўляцца з некалькімі сур'ёзнымі штормамі", — распавёў партугалец.
Матч Германія — Партугалія адбудзецца 16 чэрвеня ў Сальвадоры. Пачатак сустрэчы а 19:00 па Мінску. Пасля гэтага матчу Дзініш плануе вярнуцца дадому.
