Фінляндыя гатовая стаць медыятарам у перамовах па беларускім крызісе
Фінляндыя гатовая стаць арганізатарам або медыятарам пляцоўкі па перамовах па беларускім крызісе. Пра гэта міністр замежных спраў Фінляндыі Пека Хаавіста сказаў свайму беларускаму калегу Уладзіміру Макею падчас сустрэчы ў Нью-Ёрку, паведамляе Радыё "Свабода". Раней пра гэта фінскага дыпламата прасіла Святлана Ціханоўская.
Хаавіста прапанаваў урэгуляваць беларускі палітычны крызіс у рамках платформы АБСЕ. Парламенцкую асамблею АБСЕ з гэтымі ж мэтамі прапаноўваў неаднаразова і Офіс Ціханоўскай.
У каментары "Свабодзе" дарадца Ціханоўскай Францішак Вячорка расказаў, што яна сустракалася з міністрам Хаавіста ў сакавіку і абмяркоўвала тэму перамоваў. Было прапанавана тры варыянты пляцоўкі для перамоваў — Фінляндыя, Швейцарыя і Аўстрыя.
"Гэтая ж ідэя, наколькі мы ведаем, гучала і падчас сустрэчы міністра Макея і Хаавіста. Але, наколькі нам вядома, безвынікова. Але мы ў любым разе не трацім надзею і працягваем настойваць на перамовах", — дадае Вячорка.
Фінляндыя традыцыйна лічыцца адным з уплывовых медыятараў у міжнародных канфліктах. Менавіта ў Хельсінкі ў 1975 годзе была падпісаная дэкларацыя, на аснове якой узнікла АБСЕ.
