Ford страчвае грошы на электракарах, Кітай бачыць у ЗША партнёра. #ІхНоравы

26/04/2024 - 15:25

Міжнародныя навіны / @rubanau_collage

Філіпіны і Кітай могуць пачаць вайну з-за іржавага карабля, а ў Аўстрыі прадалі карціну Клімта, якую лічылі страчанай больш за 100 гадоў. Пра гэта і не толькі ў нашай штодзённай падборцы міжнародных навін.

Быць партнёрамі, а не супернікамі

Міністр замежных спраў Кітая Ван І перасцярог Вашынгтон ад умяшання ва ўнутраныя справы КНР. А Сі Цзіньпін на сустрэчы з дзяржсакратаром ЗША Энтані Блінкенам прапанаваў супрацоўнічаць, а не супернічаць.

Усё гэта — рэакцыя на адрасаваныя Пекіну заклікі перастаць падтрымліваць расійскую ваенную агрэсію ва Украіне.

Па выніках візіту Блінкен заявіў, што калі Кітай не прыме меры для вырашэння праблемы, Вашынгтон гатовы прымяніць санкцыі ў дачыненні да Кітая.

"Пекін не зможа дасягнуць паляпшэння стасункаў з Еўропай, падтрымліваючы найбольшую пагрозу еўрапейскай бяспецы з часоў Халоднай вайны", — сказаў дзяржсакратар ЗША.

Ford нясе велізарныя страты за электрамабілі

Падраздзяленне электрамабіляў Ford за першы квартал 2024 года прадало 10 тысяч аўтамабіляў, што на 20% менш, чым у 2023-м. А выручка кампаніі ўпала на 84%, прыкладна да $100 млн. Ford патлумачыў такія страты зніжэннем цэн на электрамабілі ва ўсёй галіне.

Акрамя таго, страты ўключаюць сотні мільёнаў, выдаткаваных на даследаванні і распрацоўку электрамабіляў наступнага пакалення.

Прыбытак прамога канкурэнта Ford — кампаніі Tesla —таксама зменшыўся. Але не настолькі драматычна. У першым квартале 2024 года дзецішча Ілана Маска зарабіла на 48% менш, чым год таму.

Вайна з-за іржавага карабля

Каб умацаваць пазіцыі ў Паўднёва-Кітайскім моры, Філіпіны ў 1999 годзе наўмысна пасадзілі на мель дэсантны карабель часоў Другой сусветнай вайны. Судна ператварылася ў фарпост філіпінскага ваенна-марскога флоту і замацавала правы Манілы на спрэчны архіпелаг Спратлі.

З тых часоў вакол карабля Sierra Madre, які ўжо 25 гадоў стаіць на адным месцы, перыядычна ўспыхваюць канфлікты. Цяпер ён зноў зрабіўся эпіцэнтрам эскалацыі напружанасці паміж Філіпінамі і Кітаем. У канфлікт могуць быць уцягнутыя і ЗША.

23 сакавіка берагавая ахова Кітая абстраляла філіпінскае судна забеспячэння, перашкодзіўшы пастаўляць на борт Sierra Madre прыпасы. А 5 сакавіка філіпінскія караблі былі абстраляныя з вадамётаў.

Любая далейшая эскалацыя, папярэджваюць заходнія і філіпінскія чыноўнікі, можа прывесці да адкрытага канфлікту. Прадстаўнікі адміністрацыі Байдэна падкрэслілі, што ўзброены напад на філіпінскі ваенны карабель выкліча ваенны адказ ЗША ў адпаведнасці з Дагаворам аб узаемнай абароне 1951 года.

Фройляйн Лізер за 30 млн еўра

Прадалі карціну Клімта, якая лічылася згубленай амаль 100 гадоў. Пра тое, што няскончаны "Партрэт фройляйн Лізер" (Bildnis Fräulein Lieser) знайшоўся і яго збіраюцца выставіць на аўкцыён, было абвешчана ў студзені гэтага года.

Партрэт замовіла сям'я яўрэйскіх прамыслоўцаў у 1917 г., за год да смерці Клімта. А ў апошні раз карціна выстаўлялася ў 1925-м.

Пасля гэтага сляды палатна згубіліся. Хто быў апошнім уладальнікам і сёлета выставіў карціну на аўкцыён — не выдаецца.

24 красавіка "Партрэт фройляйн Лізер" пайшоў з малатка ў Вене — за 30 млн еўра. Частку з утаргаваных сродкаў атрымаюць спадкаемцы сям'і яўрэйскіх прамыслоўцаў, якія замаўлялі партрэт.

Творы Густава Клімта ўжо прыносілі на аўкцыёнах дзясяткі мільёнаў. Напрыклад, яго "Дама з веерам" у чэрвені 2023 года стала самым дарагім творам мастацтва, які калі-небудзь прадаваўся ў Еўропе: за яе заплацілі 85,3 млн фунтаў.