Галоўны ідэолаг Мінска абмеркавала з навучэнцамі каледжа легпраму SMM-стратэгіі
Вольга Чамаданава ў Мінскім дзяржаўным каледжы тэхналогіі і дызайну лёгкай прамысловасці / minsknews.by
Галоўны ідэолаг Мінска Вольга Чамаданава падзялілася з навучэнцамі Мінскага дзяржаўнага каледжа тэхналогіі і дызайну лёгкай прамысловасці "спосабамі прасоўвання кантэнту ў сацыяльных сетках і стварэння SMM-стратэгіі". Пра гэта расказвае агенцтва "Мінск-Навіны".
У апошнія тыдні Вольга Чамаданава перыядычна праводзіць сустрэчы з навучэнцамі розных тэхнікумаў і ССНУ. Ужо адбыліся такія гутаркі ў кулінарным тэхнікуме, у лінгва-гуманітарным і медыцынскім каледжах.
На гэтых сустрэчах яна, мяркуючы па рэпартажах сталічнага навінавага агенцтва, расказвае пра сябе і ў тым ліку пра інтэрнэт. У прыватнасці, на апошняй сустрэчы Чамаданава заявіла, што "самы хуткі і зручны спосаб дастукацца да кожнага — месенджары і сацыяльныя сеткі".
Потым яна прывяла статыстыку аб тым, што інтэрнэтам у Беларусі карыстаецца больш за 80% жыхароў краіны.
"Парадку 4,85 млн чалавек праглядаюць сацсеткі з дапамогай смартфонаў. Многія карыстальнікі — 3,9 млн чалавек — выбіраюць Instagram. Найбольш папулярныя мэсэнджары ў беларусаў — Viber і Telegram. Ім аддаюць перавагу 87% і 76 % насельніцтва краіны адпаведна", — расказвала навучэнцам галоўны ідэолаг Мінска.
Пасля гэтага Чамаданава абмеркавала з маладымі людзьмі, як папулярызаваць сацыяльныя сеткі і мэсэнджары каледжа, і якія тэмы для пастоў будуць гэтаму спрыяць. Але што менавіта раіла навучэнцам ідэолаг, агенцтва не ўдакладняе.
