Германія каструе катоў, а заснавальнік TikTok — самы багаты кітаец: #ІхНоравы

30/10/2024 - 13:49

Міжнародныя навіны / @rubanau_collage

На вяршыні Фуджы ўсё яшчэ няма снегу, а Польшча падумвае вярнуць гандаль у нядзелі.

Пра гэта і не толькі — у нашым штодзённым аглядзе міжнародных навін.

Заснавальнік TikTok стаў самым багатым чалавекам Кітая

Заснавальнік TikTok узначаліў спіс найбагацейшых людзей Кітая — Hurun China Rich List. Багацце Чжана Іміна ацэньваецца ў $49,3 млрд, паведамляе Reuters.

41-гадовы бізнесовец пакінуў пасаду генеральнага дырэктара ByteDance, мацярынскай кампаніі TikTok, яшчэ ў 2021 годзе, але яму па-ранейшаму належыць каля 20% кампаніі.

На памер яго дабрабыту паўплываў рост даходаў ByteDance: за мінулы год выручка кампаніі вырасла на 30% і склала каля $110 млрд.

Чжам Імін ссунуў з першага радка прадпрымальніка Чжуна Шаньшаня — уладальніка кампаніі па вытворчасці бутыляванай вады. Капітал апошняга скараціўся за апошні год на 24% праз складаную эканамічную сітуацыю ў краіне.

Яшчэ адзін горад у Германіі ўвёў прымусовую кастрацыю вулічных катоў

Улады Франкфурта-на-Майне забаранілі "бескантрольнае свабоднае перамяшчэнне рэпрадуктыўных катоў", паведамляе BILD.

Цяпер усіх вулічных катоў і котак будуць адлоўліваць і пазначаць кляймом ці мікрачыпам, а потым кастраваць, перш чым адпусціць назад. Такія нормы ўжо дзейнічаюць у Берліне і Кёльне.

Улады Франкфурта-на-Майне тлумачаць гэта клопатам пра саміх жывёл: бескантрольнае размнажэнне прывяло да таго, што ў прытулках няма месца, а нованароджаныя кацяняты масава паміраюць.

Уладальнікаў хатніх гадаванцаў заклікаюць пільна сачыць за жывёламі: калі іх зловяць адных, то каструюць праз 48 гадзін, калі гаспадар не аб'явіцца. Выдаткі на аперацыю (230-290 еўра) ускладуць на ўладальніка.

Польшча думае пра аднаўленне нядзельнага гандлю

З 2018 года ў Польшчы гандаль у нядзелі забаронены для шэрагу аб'ектаў, але эксперты адзначаюць, што змены ў спажывецкіх звычках сведчаць пра неабходнасць перагледзець гэтыя правілы, паведамляе Euronews.

Польшча аднавіла дыскусію пра нядзельны гандаль пасля таго, як спажыўцы папрасілі даць ім дадатковы дзень для выканання паўсядзённых справаў.

Цяпер гандаль і любая дзейнасць, звязаная з гандлем, у камерцыйных установах у нядзелі забароненая. Аднак гэтае правіла не распаўсюджваецца на паштовыя службы, цукерні, аўтазаправачныя станцыі, кветкавыя крамы, газетныя кіёскі і кавярні.

Забарона была ўведзеная былой кіроўнай партыяй "Закон і справядлівасць" (PiS). Аднак новы ўрад паабяцаў адмяніць гэтую забарону пасля змены ўлады ў снежні 2023 года.

Дэпутат ад партыі "Польшча 2050" Рышард Петру сцвярджае, што паслабленне забароны на гандаль у нядзелі прывядзе да павелічэння абароту ў рознічным гандлі прыкладна на 4%, а таксама створыць каля 40 000 новых працоўных месцаў.

Гара Фудзі ўпершыню за 130 гадоў засталася без снегу на вяршыні

Гара Фудзі засталася без снегу пасля самага гарачага лета ў гісторыі Японіі. Гэта самы працяглы перыяд без снегу з моманту пачатку назіранняў 130 гадоў таму, паведамляе The Guardian.

Паводле інфармацыі Метэаралагічнага агенцтва Японіі, звычайна снежная шапка на вулкане пачынае фармавацца 2 кастрычніка, а летась снег выпаў 5 кастрычніка.

Але праз анамальную сёлетнюю спёку на самым высокім пункце Японіі снег да канца кастрычніка так і не з'явіўся.

Метэаролаг Ютака Кацута з мясцовага ўпраўлення ў Кофу адзначыў, што паказчыкі гэтага года пабілі рэкорды, зафіксаваныя ў 1955 і 2016 гадах. Лета 2024 года стала самым гарачым за ўсю гісторыю назіранняў у краіне, што звязана з экстрэмальнымі хвалямі цяпла і глабальнымі зменамі клімату.