Навучыся эканоміць — і выжывеш: як беларусы даюць рады выдаткам | Навіны Беларусі

Эканомнасць — вельмі карысны навык. Часта ён дапамагае адкладаць грошы на буйныя пакупкі, а ў Беларусі — яшчэ і проста выжываць.

Еўрарадыё на ўмовах ананімнасці спытала ў звычайных беларусаў, як і на чым яны эканомяць, і даведалася некалькі карысных лайфхакаў.

Марына. Мама

Як кажа мая мама, хочаш зэканоміць — гатуй дома. Ежа мусіць быць сытнай і карыснай, каб хапіла на некалькі дзён і не давялося пастаянна стаяць ля пліты.

У крамах пастаянна праходзяць распродажы і акцыі на пэўныя тавары. Я гэта адсочваю, у тым ліку на сайтах накшталт "усе зніжкі Мінска". Абавязкова трэба мець дысконтныя карты і падпісацца на рассылкі з SMS-паведамленнямі.

Наогул, наведваючы крамы, ужо ведаеш на памяць, дзе які асартымент і цэны. У гэтым сэнсе выбар ёсць на любы кашалёк.

Бытавая хімія. Узаемазамяняльнасць марак вітаецца — часам знаходзіш прадукты нават лепшыя і таннейшыя, чым фірмовыя брэнды.

Адзенне. Вельмі ратуе сэканд-хэнд, асабліва для дзяцей — яны хутка растуць, памеры мяняюцца, пастаянна купляць новае проста нявыгадна. Ну а калі трэба нешта з новага адзення, то ратуюць міжсезонныя распродажы.

Адпачынак. Сёлета цэны на адпачынак былі завоблачнымі, таму ў Турцыю не злёталі. Затое выбраліся ў Беларускі санаторый і выдатна прабавілі час. А што яшчэ трэба? Паляжаць, выспацца, свежае паветра і цішыня. Так, нехта любіць актыўны адпачынак, але мне і ў жыцці руху хапае.

У эканоміі самае галоўнае — гэта жаданне і пазітыўны настрой. Вядома, гэта не для ўсіх, для многіх эканомія — сапраўдная пакута. Такое, напэўна, прыходзіць з досведам.

Так жыве ўвесь свет. Мала каму ўдаецца выдаткоўваць на шырокую нагу.

Сяргей. Студэнт

Цяпер я вучуся на першым курсе ўніверсітэта і, хоць пераехаў у Мінск з невялікага горада, пра жыццё тут пакуль магу расказаць няшмат.

Што ў мяне па фінансах за верасень: мама даслала 200 рублёў, яшчэ 100 з капейкамі — гэта стыпендыя, плюс трохі дапамагла бабуля на пачатак навучальнага года. У выніку — 400 рублёў.

Ты жывеш адзін, трэба кожны дзень нешта есці, ездзіць ва ўнівер і гэтак далей, і прыходзіць разуменне, што гэтых грошай вельмі мала. Але ў цэлым мне ўдалося пражыць на гэтую суму без асаблівых праблем.

Вельмі ратуе дапамога ад мамы: яна перадае хатнія нарыхтоўкі, гатовую ежу ў кантэйнерах, гародніну (у тым ліку бульбу). Так што ў мяне амаль заўсёды ёсць вячэра. Часам нават атрымліваецца ўзяць нешта з сабой на наступны дзень, каб паабедаць на вучобе.

Значная частка бюджэту ідзе на праязны і аплату інтэрната — гэта адразу мінус 100 рублёў. Астатняе ў асноўным аддаю на ежу цягам дня. Напрыклад, амаль кожны дзень абедаю ва ўніверсітэцкай сталоўцы. У залежнасці ад апетыту пакідаю там ад 5 да 12 рублёў.

На бытавую хімію мы скідваемся з суседзямі па пакоі — здаецца, у нас на гэта пайшло каля 15 рублёў. Асабістыя сродкі гігіены таксама не забіраюць шмат. Дзяўчатам, напэўна, складаней, а мне асабліва нічога не трэба, акрамя зубной пасты, мыла і шампуня.

Вопраткі на гэтыя грошы, вядома, не купіш: калі нешта спатрэбіцца, давядзецца прасіць у мамы ці бабулі. Або спрабаваць адкладаць, не ведаю. Падпрацоўку шукаць пакуль не планую — я яшчэ не прывык да ўніверсітэта, і з працай было б занадта складана.

На забавы сёе-тое застаецца. Калі хочацца схадзіць у кіно, то іду, калі хочацца купіць кавы — купляю. Галоўнае, калі бачыш, што грошай хапае — можна часам сабе дазволіць, але нячаста.

Студэнцкае жыццё поўнае розных складанасцяў, але яно ў мяне толькі пачалася. Думаю, за наступныя 4 гады ў мяне яшчэ будуць усялякія цікавыя гісторыі пра "выжыванне".

Людміла. Пенсіянерка

Паводле беларускіх мерак я атрымліваю вельмі добрую пенсію — трохі менш за 800 рублёў. Гэтым летам я яшчэ і падзарабіла, прадаўшы на рынку тое, што змагла вырасціць на лецішчы, так што для жыцця ў Беларусі мне ў цэлым хапае.

Так, эканомлю. Гародніны, некаторай садавіны і бульбы не купляю — гэтым мяне цалкам забяспечвае лецішча. Усё астатняе імкнуся браць толькі па акцыях або на рынку. Напрыклад, мяса ці сала ў мясных крамах на кірмашах звычайна якаснейшае і таннейшае, чым у крамах.