Кітайскі стадыён у Мінску: дарагая будоўля без міжнародных матчаў

А вось у Беларускай федэрацыі футбола сякімі-такімі планамі з намі падзяліліся.

— Пакуль дакладнай інфармацыі ў нас няма, у любым выпадку, калі нешта стане вядома, мы паведамім пра гэта і ў сацсетках, і на нашым сайце. Адкрыццё плюс-мінус будзе 31 снежня, але і гэта яшчэ не факт, аж дакладнай даты яшчэ пакуль няма.

— А як будзе выкарыстоўвацца стадыён, калі зборнай нельга гуляць у Беларусі?

— Ну, на наступны сезон яшчэ незразумела, дзе будзе гуляць зборная — гэта пакуль яшчэ адкрытае пытанне. Лепш за ўсё дачакацца наступнага года і глядзець на тое, якія рашэнні там [ва УЕФА] будуць. То-бок забароны на наступны сезон пакуль няма. Гэта яшчэ асобна будзе высвятляцца. Надзея ёсць заўсёды.

— Можа, стадыён аддадуць якой-небудзь камандзе з Вышэйшай лігі?

— Пакуль я такой інфармацыі не чуў. Прынамсі, да адкрыцця гэта прапрацоўвацца не будзе. У любым выпадку стадыён ужо ёсць, і, я думаю, знойдуць яму прымяненне.

“Ну, будуць гуляць серыі з расіянамі”

На думку вядоўцы ютуб-канала “ЧестнОК” Яраслава Пісарэнкі, рашэнне пабудаваць стадыён прынялі яшчэ да банаў і санкцый УЕФА, таму "заднюю даваць ужо позна".

— Для чаго ўсё гэта трэба? Ну, будуць гуляць з расіянамі. Ёсць "Барысаў-Арэна", ёсць "Дынама", а цяпер з'явіцца і гэты кітайскі стадыён. Будуць арганізоўваць нейкія серыі матчаў, кагосьці будуць запрашаць, спадзеючыся, што ў нейкі момант абмежаванні здымуць. Але, на маю думку, тут няма нейкага схаванага сэнсу: стадыён будзе стаяць, як і "Барысаў-Арэна", на якой БАТЭ далёка не заўсёды праводзіць гульні.
 

Што за стадыён?

Будаўніцтва Нацыянальнага стадыёна ў Мінску пачалося летам 2020 года.

Як казаў першы намеснік старшыні АБФФ Сяргей Сафар'ян у 2017-м, рашэнне пра будаўніцтва арэны было прынятае падчас перамоваў Лукашэнкі і старшыні КНР.

"Кітайскі бок пабудуе Нацыянальны стадыён у дар нашай рэспубліцы", — сказаў тады чыноўнік.

У выніку ў Паднябеснай на будаўніцтва вылучылі 240 мільёнаў долараў, а потым суму павялічылі яшчэ на 52 мільёны. Акрамя стадыёна на гэтыя сродкі Кітай таксама пабудаваў у Мінску "басейн міжнароднага класа".

Сцвярджаецца, што з беларускага бюджэту грошы выдаткаваныя не будуць (беларускі бок праводзіў толькі падрыхтоўчыя працы).

Як пісалі "Беларусы і рынак", будаўніцтва вядуць кампаніі, у партфоліа якіх — нацыянальны стадыён "Птушынае гняздо" (галоўная арэна Алімпіяды-2008), нацыянальны культурны і спартыўны цэнтр Wukesong, Алімпійская вёска, архітэктурны ансамбль плошчы Цяньаньмэнь, пекінскі аэрапорт "Шоўду", аэрапорт "Дасін", будынак Цэнтральнага тэлебачання, а таксама першая лінія пекінскага метро.
 

І для чаго ён патрэбны?

Новы 33-тысячны Нацыянальны стадыён месціцца побач з легендарным "Трактарам" на вуліцы Ванеева. Паводле заказчыкаў і беларускіх чыноўнікаў, ён будзе адпавядаць усім патрабаванням ФІФА і УЕФА.

БЕЛТА ў 2020-м пісала, што тут "можна праводзіць адборачныя матчы чэмпіянату Еўропы і свету, Лігі чэмпіёнаў УЕФА і Лігі Еўропы, а таксама Суперкубак УЕФА"

У 2019 годзе на сустрэчы з прэзідэнтам УЕФА Аляксандрам Чаферыным Лукашэнка прызнаўся, што хоча правесці ў Мінску Суперкубак УЕФА. А ў Федэрацыі футбола Беларусі казалі, што Мінск пазмагаецца за заяўку 2022-2023 года.

Але, здаецца, амбіцыйным планам пакуль не наканавана спраўдзіцца — праз саўдзел у вайне ва Украіне Беларусь трапіла пад санкцыі УЕФА.

Не, нашую краіну не дыскваліфікавалі, як Расію (зборная Беларусі і беларускія клубы па-ранейшаму могуць гуляць у турнірах УЕФА), але забаранілі праводзіць любыя міжнародныя матчы на сваёй тэрыторыі.

Напрыклад, апошнія пару гадоў нацыянальная каманда прапісалася ў Венгрыі, а мінскае "Дынама" гуляе хатнія матчы групавога этапу Лігі канферэнцый у Азербайджане.