Гродзенскія кінатэатры замест кіно пакажуць хакей
Кінатэатр "Чырвоная зорка" ў Гродне / grodnovisafree.by
На прагляд хакея замест кінафільмаў запрашаюць гродзенскія кінатэатры, піша Hrodna.life.
18 красавіка ў кінатэатрах "Чырвоная зорка", "Усход" і кіназале моладзевага цэнтра "Гродна" пакажуць хакейны матч паміж мясцовым клубам "Нёман" і жлобінскім "Металургам". Цэны на квіткі пачынаюцца ад 7,50 рубля. Месца "камфорт" або на VIP-гаўбцы будзе каштаваць 10 рублёў.
Дарэчы, квіток на сам хакейны матч абыйдзецца ў 6-7 рублёў (для дзяцей — 4-5 рублёў).
Беларускія кінатэатры з 2022 года страцілі магчымасць легальна набываць для паказу заходнія фільмы. Пасля гэтага ў пракаце сталі з'яўляцца пірацкія копіі.
