Іх норавы: Ілан Маск спрачаецца пра Крым, Канье Уэст пераасэнсоўвае BLM

Кожны тыдзень мы збіраем навіны, якія трапілі на старонкі сусветных СМІ, але прайшлі незаўважанымі ў Беларусі. Мы ж разумеем, што сачыць за ўсім гэтым, калі ў нашым рэгіёне ўсё наэлектрызаванае, — цяжкавата. Але вы нічога не прапусціце.
 

Ілан Маск забаўляецца ў твітары

Ілан Маск нясумна ўвайшоў у працоўны тыдзень: у панядзелак увечары ён распісаў у некалькіх твітах сваё бачанне заканчэння вайны ва Украіне. Прапанаваў паўтарыць рэферэндумы ў далучаных рэгіёнах пад наглядам ААН, аддаць Крым Расіі, пакінуць Украіну нейтральнай. Пасля пералічэння ўмоў міру ён прапанаваў карыстальнікам прагаласаваць ("так/не") і сказаў, што гэта — адзін з самых імаверных сцэнароў, "пытанне толькі ў тым, колькі людзей памрэ да гэтага".

Пасля гэтага пачаўся срач, які не канчаецца дагэтуль. Дзясяткі тысяч простых карыстальнікаў твітара і вядомыя людзі пачалі адказваць Маску. Сярод іх — прэзідэнт Літвы, прэзідэнт Украіны, еўрачыноўнікі.

Вось што прапанаваў Маску прадстаўнік Офіса прэзідэнта Украіны Міхаіл Падаляк: Украіна вызваляе свае тэрыторыі. Уключаючы анексаваны Крым. Расія праходзіць дэмілітарызацыю і абавязковую дэнуклеарызацыю і больш не можа пагражаць іншым, ваенныя злачынцы падпадаюць пад міжнародны трыбунал. І таксама прапанаваў галасаванне.

А Зяленскі, выйшаўшы на сцежку інтэрнэт-вайны, прыдумаў апытанне "Які Ілан Маск вам падабаецца больш?" з варыянтамі адказаў: "Маск, які падтрымлівае Украіну" і "Маск, які падтрымлівае Расію".

Нічога не спыніла прадпрымальніка. Ён працягнуў і працягвае напісваць твіты пра Крым. Нават спрабаваў заклікаць да рацыянальных довадаў: "Насельніцтва Расіі роўнае тром насельніцтвам Украіны, таму перамога Украіны ў татальнай вайне малаімаверная. Калі вы клапоціцеся пра народ Украіны, шукайце міру". І скрыншоты з сацыялагічнымі даследаваннямі 2014 года выкладвае. Увогуле, як кажуць у твітары "ладна накінуў". Цікава, чым і калі гэта скончыцца. Можа, украінцы "закэнсэляць" Маска? 
 

Канье Уэст анансаваў стварэнне свайго моднага дома

На паказе ў Парыжы рэпер прэзентаваў новую калекцыю адзення, якая спатрэбіцца выжылым пасля апакаліпсісу. Нічога асабліва там не было цікавага — дзеці, якія спяваюць, малітвы, артхауснасць і багемнасць. Але раптам усеагульная ўвага пераключылася на худзі, у якім прыйшоў Канье. На ім быў надпіс White Lives Matter. Адказ на лозунг Black Lives Matter, які ўскалыхнуў Амерыку некалькі гадоў таму.

У твітары, як і з выхадкамі Маска, пачаўся праўдзівы кашмар. І дарэчы, таксама пакуль не скончыўся. Чакаем, што будзе, можа, амерыканцы "закэнсэляць" Канье?
 

Расіяне ўцякаюць ад мабілізацыі праз Чукотку ў Амерыку

У чацвер амерыканскія паліцэйскія затрымалі дваіх мужчын, якія праплылі на лодцы 300 кіламетраў праз Берынгаў праліў і высадзіліся на востраве Святога Лаўрэнція. У размове з мясцовымі мужчыны, якія прыплылі, прызналіся: "уцякаюць ад расійскага войска". Амерыканскія ўлады заявілі, што гэта адзінкавы выпадак і флатыліі лодак з расійскімі мужчынамі ля сваіх берагоў не чакаюць.
 

У Сербіі адкрылі новы від насякомага і назвалі ў гонар папулярнага тэнісіста — Новака Джокавіча

Істоту выявілі ў пячоры Сіміна-яма ў заходняй Сербіі. Вядома, што яно вядзе пячорны лад жыцця і з'яўляецца драпежнікам.

Ну а сваё зорнае імя яно атрымала толькі таму, што навукоўцы, якія адкрылі яго, — прыхільнікі Джокавіча. Яны запэўніваюць, што казурка такая ж хуткая, моцная і цягавітая, як тэнісіст.

Як кажуць, а чаго ў сваім жыцці дамогся ты?
 

"Давай па новай, Міша, усё х***я". Той самы мэр Харкава Міхаіл Добкін, які ніяк не мог запісаць свой зварот, пайшоў служыць ва УСУ

Фота Добкіна на мяжы нядаўна вызваленай Бараўской грамады, апублікавала яго дачка Ала.
 

"Вы пыталіся, дзе мой тата... У камандзіроўцы... У вельмі кароткай. Люблю і ганаруся. Слава Украіне і нашай зямлі", — падпісала фатаграфіі і відэа ў сваім Instagram Ала Добкіна.

На фота Добкін — у форме УСУ і з сіняй апазнавальнай павязкай на рукаве.