Інтэграцыя з Расіяй: як Беларусь страчвала суверэнітэт у 2024 годзе

31/12/2024 - 10:52

Уладзімір Пуцін і Аляксандр Лукашэнка / ria.ru

З юрыдычнага гледзішча беларускі суверэнітэт не страчаны, але ў 2024 годзе хапала крокаў з боку Лукашэнкі, якія кідалі Беларусь у моцныя абдымкі Расіі.

Гэта зліццё ідзе ў двух асноўных напрамках: ваенным і падатковым. Калі з першым усё стала максімальна відавочна яшчэ ў 2022 годзе, то па другой тэме ідуць абмеркаванні.

Так, у снежні 2024 года беларускі намеснік міністра падаткаў і збораў Уладзімір Муквіч заявіў, што Беларусь і Расія займаюцца сінхранізацыяй падатковых сістэм.

"У рамках Саюзнай дзяржавы шмат пытанняў па збліжэнні падыходаў, у тым ліку ў падаткаабкладанні. Нашымі краінамі абмяркоўваюцца і выпрацоўваюцца пэўныя карэкціроўкі, якія збліжаюць гэтыя падыходы. Ёсць шмат нацыянальных асаблівасцяў, і чакаць, што ў нас будзе прамое калькаванне, не варта. У той жа час мы выпрацоўваем інтэграцыйныя моманты, якія дазваляюць бясшоўна ажыццяўляць узаемадзеянне з суб'ектамі гаспадарання", — сказаў ён.

Интеграция с Россией: как Беларусь теряла суверенитет в 2024 году

"Арэшнік" / АР

Гарантыі бяспекі

6 снежня прэзідэнт Расіі Уладзімір Пуцін і Аляксандр Лукашэнка падпісалі дамову аб гарантыях бяспекі ў рамках Саюзнай дзяржавы. Таксама яны зацвердзілі, што ў наступным годзе пачнецца рэалізацыя новай канцэпцыі бяспекі, а Расія паставіць Беларусі ракетны комплекс "Арэшнік".

У падпісаным дакуменце, сярод іншага, вызначаюцца ўзаемныя абавязацельствы ў галіне абароны, абароны суверэнітэту, незалежнасці і канстытуцыйнага ладу абедзвюх краін, а таксама забеспячэння цэласнасці і недатыкальнасці тэрыторыі і вонкавай мяжы СД. А для вырашэння гэтых задач краіны могуць задзейнічаць "усе наяўныя сілы і сродкі", указаў Пуцін.

Ядзерная дактрына РФ

19 лістапада Уладзімір Пуцін зацвердзіў абноўленую ядзерную дактрыну РФ, у якой згадваецца і Беларусь. Згодна з новым дакументам, Расія зможа выкарыстаць ядзерную зброю ў выпадку "крытычнай пагрозы сабе і Беларусі".

На думку многіх экспэртаў, гэтае ўключэнне нашай краіны ў расійскую ядзерную дактрыну толькі сведчыць аб "дэсуверэнізацыі Беларусі".

Моладзевая палітыка

У канцы года ў Маскве намесніца міністра адукацыі Беларусі Кацярына Пятруцкая і часовы выканальнік абавязкаў кіраўніка Федэральнага агенцтва па справах моладзі Расіі Дзяніс Ашыраў падпісалі "дарожную карту" ў сферы моладзевай палітыкі. Дакумент прынялі на 2025-2027 гады.

Паводле Пятруцкай, бакі "кансалідуюць намаганні на фарміраванне грамадзянска-патрыятычных поглядаў маладых людзей і захоўваюць гісторыю Вялікай Айчыннай вайны і яе пераможцаў".

Турызм

Беларусь і Расія ў 2024 годзе падпісалі план па сумесным развіцці турызму. Намеснік міністра спорту і турызму Беларусі Алег Андрэйчык адзначыў, што бакі "пазначылі арыенціры, у тым ліку ў частцы максімальнай уніфікацыі заканадаўства паміж краінамі, нарматыўна-прававой базы, зняцця бар'ераў для вядзення турыстычнай дзейнасці".

Дарэчы, у студзені 2025 года павіннае ўступіць у сілу пагадненне аб прызнанні віз для грамадзян трэціх краін.

Адмена роўмінгу

У лістападзе 2024-га Савет міністраў Саюзнай дзяржавы Расіі і Беларусі ўхваліў рэзалюцыю аб адмене роўмінгу паміж краінамі. Гэтая "дарожная карта" была падпісаная яшчэ ў 2019 годзе, але яе ўкараненне некалькі разоў адкладалася. У выніку новаўвядзенне павінна ўступіць у сілу 1 сакавіка 2025 года, вядома, калі зноў ніхто не дасць задні ход.

Ці дае такая цесная інтэграцыя выгаду Лукашэнку?

Палітычны аналітык Арцём Шрайбман у каментары "Обычному утру" заявіў, што збліжэнне Беларусі і Расіі прыносіць Лукашэнку больш мінусаў, чым плюсаў.

"Проста цяпер мы бачым, што эканоміка Расіі ўжо не такі стымул для эканамічнага росту Беларусі. Многія хваробы расійскай эканомікі проста аўтаматычна пераходзяць да нас, адпаведна, больш паглыбленая інтэграцыя ўжо не нясе такой жа дабаўленай вартасці, як яна несла ў моманты, калі гэта наўпрост канвертавалася ў новыя крэдыты, у зніжкі на газ, у зніжкі на нафту і г. д.

Арцём Шрайбман / Еўрарадыё

Таму далей гэта, па сутнасці, саступкі нейкіх фрагментаў беларускага суверэнітэту, што не з'яўляецца для Лукашэнкі бонусам. Да таго ж такая аднабаковая прывязка азначае, што ў Беларусі нашмат складаней будзе выратавацца ад крызісу ў Расіі.

Думаю, што для Лукашэнкі гэтыя меры вымушаныя, яму іх навязваюць. Адзінае, што яму па дружбе даюць зрабіць — гэта ўдаваць, што ён сам іх можа ініцыяваць", — сказаў ён.