Каб спыніць фуру, даішнікі стралялі па ёй 80 разоў (фота)

Увечары 27 ліпеня слонімскія даішнікі затэлефанавалі калегам у Баранавічы і папрасілі дапамагчы спыніць неадэкватнага кіроўцу. Аўтовоз з мінскімі нумарамі, віляючы з боку ў бок і ігнаруючы патрабаванні аб прыпынку, ехаў па трасе М1 у напрамку Баранавічаў.

Па дарозе гэты аўтовоз учыніў тры аварыі ў Гродзенскай вобласці. Спрабуючы яго спыніць, супрацоўнікі Слонімскай ДАІ расстралялі па колах каля 80 патронаў, але машына, віляючы, працягвала рухацца.

Не спыніўся парушальнік і на патрабаванні баранавіцкіх інспектараў. Яны таксама пачалі страляць па колах, прабілі паліўны бак. Аднак парушальніка не спыніла і гэта, піша "Intex-press".

Толькі калі ўсё паліва выцекла з бака, фура спынілася. Па падліках супрацоўнікаў ДАІ, за неадэкватным кіроўцам яны гналіся каля 150 кіламетраў.

Сам парушальнік за чатыры дні да здарэння адзначыў сваё 30-годдзе. Верагодна, за рулём ён быў нецвярозы. На кіроўцу начапілі кайданкі і павезлі яго ў Слонім. Вядзецца праверка.

Фота — intex-press.by