Каманда Бабарыкі агучыла сваю стратэгію на канстытуцыйным рэферэндуме

Каманда Віктара Бабарыкі апублікавала сваю стратэгію дзеянняў на канстытуцыйным рэферэндуме.

Прапануюцца тры крокі: 

— прыйсці на ўчасткі менавіта 27 лютага — у дзень асноўнага галасавання;
— выказаць нязгоду з прапанаванымі зменамі любым законным спосабам;
— пасміхацца адзін аднаму, кантактаваць і на свае вочы паглядзець, як нас шмат.

Рэферэндум прызначаны на 27 лютага. На ім улады будуць пытанцца, ці згодныя вы са зменамі ў Канстытуцыю. 

Каманда Бабарыкі нагадвае, што для прыняцця зменаў у Канстытуцыю неабходна, каб "за" прагаласавала больш за 50% усіх выбарцаў, унесеных у спісы для галасавання.

"Менавіта колькасць "за" мае значэнне, таму для дэманстрацыі нязгоды абсалютна ўсё роўна, стаіць у бюлетэні адзнака "супраць" ці ён прызнаны несапраўдным", — зазначаюць прыхільнікі Бабарыкі.

Раней прадстаўнікі дэмакратычных сілаў заклікалі сваіх прыхільнікаў паставіць крыжыкі ў абодвух варыянтах адказу на бюлетэні, каб зрабіць яго несапраўдным.