Кіраўнік Нацбанка: Курс беларускага рубля блізкі да раўнаважнага

Курс беларускага рубля блізкі да раўнаважнага. Пра гэта старшыня праўлення Нацбанка Павел Калаўр паведаміў падчас сустрэчы з Аляксандрам Лукашэнкам, якая прайшла 25 студзеня. 

Кіраўнік дзяржавы пацікавіўся сітуацыяй у сферы крэдытна-фінансавых арганізацый і банкаўскай сістэме. "Як у нас развіваюцца падзеі на валютным рынку перш за ўсё? Што мы можам чакаць у будучым ад курсу рубля? Гэта вельмі важна для нашай эканомікі ў цэлым", — цытуе словы Лукашэнкі яго прэс-служба. 

У адказ Калаўр падкрэсліў, што курс рубля блізкі да раўнаважнага. "Дзякуючы той палітыцы, якую праводзілі ў папярэднія некалькі гадоў, мы выйшлі на курс, які, з аднаго боку, цалкам задавальняе нашых экспарцёраў, з другога — ён адпавядае задачам падтрымання фінансавай і цэнавай стабільнасці", — растлумачыў ён сітуацыю на валютным рынку.