Краіны G7 будуць працягваць ізаляцыю Беларусі і Расіі ад сусветнай эканомікі

Краіны G7 будуць працягваць ізаляцыю Беларусі і Расіі ад сусветнай эканомікі. Гэта будзе іх адказ на расійскую агрэсію супраць Украіны. Пра гэта гаворыцца ў паведамленні міністраў фінансаў. Адзначаецца, што цана вайны для агрэсара будзе павышацца: "Мы падкрэсліваем сумесную прыхільнасць да нашага непахіснага і каардынаванага санкцыйнага адказу". Падкрэсліваецца, што краіны G7 будуць працягваць уважліва сачыць, "каб не дапусціць ухілення, абыходу ці замяшчэння" дзейных санкцый.

Таксама міністры фінансаў заявілі, што Масква і Мінск "нясуць на сабе поўную адказнасць за сацыяльныя і эканамічныя наступствы" вайны.

У G7 уваходзяць Вялікабрытанія, Германія, Італія, Францыя, ЗША, Канада і Японія. У самітах аб'яднання звычайна ўдзельнічаюць і прадстаўнікі Еўрасаюза. У пачатку траўня лідары G7 заявілі, што прыкладуць усе намаганні, каб прыцягнуць да адказнасці не толькі Уладзіміра Пуціна, але і Аляксандра Лукашэнку.