Луганскія сепаратысты патлумачылі, навошта збілі самалёт з вайскоўцамі
Прыхільнікі ЛНР пацвердзілі, што менавіта яны падбілі самалёт узброеных сіл Украіны, у выніку чаго загінула 49 вайскоўцаў.
Прадстаўніца прэс-службы штабу Луганскай народнай рэспублікі Аксана Чыгрына ў інтэрв’ю Радыё Свабода пракаментавала гэта наступным чынам:
“Самалёт збілі апалчэнцы. Быў парушаны загад Болатава аб закрытай паветранай прасторы над Луганскам. У дакуменце гаварылася, што ў выпадку парушэння загаду будуць зробленыя адпаведныя захады”.
Як паведамляе УНІАН, 14 чэрвеня, каля 1.10 у часе заходу на пасадку ў аэрапорце Луганска стрэлам з зенітнага ракетнага комплексу баевікі збілі ваенна-транспартны самалёт Узброеных сіл Украіны Іл-76. На борце, апроч 9 сябраў экіпажу, знаходзілася 40 вайскоўцаў. Усе яны загінулі.
Пракуратура распачала крымінальную справу паводле артыкула “тэракт”.
Фота: REUTERS
