Лукашэнка не мае намеру прадаваць завод колавых цягачоў

Кіраўнік Беларусі Аляксандр Лукашэнка падчас наведвання завода колавых цягачоў заявіў, што дзяржава пакуль не мае намеру прадаваць гэтае прадпрыемства.

“Я не хацеў бы прыватызаваць (чытай: аддаваць за бясплатна) тое, што створана народам”, — заявіў ён.

Лукашэнка таксама сказаў, што апошнія некалькі гадоў яму навязваюць ідэю прыватызацыі і продажу завода. І вельмі шмат прапаноў паступала ад Расіі.

“Калі нешта і прадаваць, то гэта трэба прадаваць за вялікія грошы. Але нам часта кажуць: мы можам за мільярд даляраў такі завод пабудаваць, а вы ад нас патрабуеце два мільярды. Я кажу: паспрабуйце”, — цытуе словы кіраўніка Беларусі Беларускае тэлеграфнае агенцтва.

Разам з тым, Лукашэнка заявіў: “Але калі 3 млрд пакладуць, будзем разглядаць гэтае пытанне. Тады я буду адказваць за адно: каб вашы правы як удзельнікаў працоўнага калектыва не былі парушаныя, каб атрымлівалі нармальную зарплату і каб не кіравалі вамі не так, як трэба. Таму што, хто б сюды ні прыйшоў, гэта не іх краіна, не іх зямля, і людзі чужыя. Выціснуць, атрымаць нармальны тавар, менш заплаціць — мы гэта ўжо ведаем. Але яны таксама ведаюць маё стаўленне да гэтага”. Ён нагадаў, што ў Беларусі ўжо вярталі дзяржаве прадпрыемствы, дзе нядобрасумленна працаваў прыватнік.

Фота: belta.by