Лукашэнка згадаў пра "дзясяткі, а можа і сотні магіл" на мяжы з Польшчай
9 траўня ў сваёй прамове з нагоды Дня перамогі Аляксандр Лукашэнка гаварыў на самыя разнастайныя тэмы. Нечакана згадаў ён і выдумкі польскага дэзерціра Эміля Чэчкі, які ў канцы мінулага года перайшоў на беларускую тэрыторыю і заявіў, што польскія вайскоўцы ўчыняюць масавыя забойствы мігрантаў і валанцёраў. Ніякіх доказаў ён не прывёў, а ў ААН заявілі, што інфармацыі пра масавы расстрэл мігрантаў на мяжы Беларусі і ЕС няма. Чэчку актыўна выкарыстоўвала беларуская прапаганда, а ў сакавіку сёлета яго знайшлі павешаным у Мінску.
"Вы баіцеся пусціць туды [на польска-беларускую мяжу] людзей, таму што яны ўбачаць дзясяткі, а можа быць і сотні магіл загінулых людзей, якія ішлі да вас на ваш заклік зусім нядаўна праз нашу мяжу! — эмацыйна гаварыў Лукашэнка. — Вы іх хапалі, забівалі і закопвалі там, на тым месцы ў лесе!".
Аляксандр Лукашэнка не стаў "расшыфроўваць", хто ж "забіваў" і "закопваў". Як бачым, выдумкі польскага дэзерціра працягваюць транслявацца. Як і прыдуманы "заклік" Захаду да мігрантаў. Насамрэч, адказнасць за міграцыйны крызіс была ўскладзена на афіцыйны Мінск.
