Міліцыя шукае махляра, які падмануў людзей на 35 тысяч долараў
Міліцыя шукае чалавека, які абяцаў людзям дапамагчы са стажыроўкай за мяжой, але падмануў іх. Адной з ахвяраў падману стала дзяўчына, якая хацела атрымаць замежную стажыроўку ў сферы гасцінічнага бізнэсу, паведамляе БЕЛТА. Яна заплаціла махляру 1 650 еўра за паслугі, бо ён дзейнічаў нібыта ад імя легальнай фірмы. Пазней дзяўчына падала дакументы ў амбасаду, каб атрымаць візу і ехаць на стажыроўку, але ж візу ёй не далі: паперы выявіліся фальшывымі. Гэта не адзіны выпадак такога махлярства. Міліцыя мае яшчэ як мінімум 10 скаргаў на дырэктара гэтай фірмы. Агулам ён падмануў людзей на 35 тысяч долараў.
