Міліцыя затрымала паляўнічага, які страляў па зайцы ў вёсцы

Гамяльчанін зладзіў паляванне на зайца са стральбой проста ў вёсцы. У суботу раніцай на спецлінію 102 паступіла паведамленне ад жыхаркі вёскі Каравышань Гомельскага раёна. Жанчына распавяла, што з кустоў маліны выйшаў невядомы мужчына з ружжом і пайшоў агародам, страляючы ў бок дамоў. Адзін са стрэлаў трапіў у сцяну гаража.

На месца выехаў нарад ДАІ, Дэпартамента аховы і атрад АМАПа. У вёсцы праваахоўнікі пабачылі мужчыну ў камуфляванай вопратцы, які сваімі прыкметамі супадаў з невядомым стралком. Яго затрымалі. Высветлілася, што 43-гадовы жыхар Гомеля прыехаў паляваць на зайца ў ваколіцах вёскі. Ён меў усе патрэбныя дакументы на зброю і паляўнічую пуцёўку.

Але мужчына не ўлічыў, што забараняецца страляць або нават знаходзіцца з зараджанай зброяй бліжэй чым на 200 метраў ад населенага пункта. Калі ён выходзіў з лесу ў боку агародаў, то заўважыў зайца і стаў па ім страляць. Зайца ён падстрэліў, забраў тушу і панёс у лес. Затым вярнуўся ў вёску, дзе яго затрымала міліцыя.

Па факце інцыдэнту праводзіцца праверка, паведамляе прэс-служба УУС Гомельскага аблвыканкама.