Мінздароўя: медустановы Мінска вяртаюцца да планавага рэжыму работы

Медустановы Мінска паступова вяртаюцца да планавага рэжыму работы, расказаў журналістам Дзмітрый Піневіч, першы намеснік міністра аховы здароўя.

Пачаў аказваць пакуль што толькі хірургічную дапамогу Мінскі гарадскі анкалагічны дыспансер, у якім пад пацыентаў з COVID-19 былі перапрафіляваныя два корпусы. Плануецца, што з 2 чэрвеня медустанова будзе прымаць пацыентаў па ўсіх напрамках. Таксама намеснік міністра анансаваў вяртанне да планавага рэжыму работы гінекалагічнай бальніцы Мінска.

— Потым — бальніца хуткай медыцынскай дапамогі, куды прыпынена шпіталізацыя. Паглядзім некалькі дзён і будзем уводзіць гэты найбуйнейшы цэнтр для аказання экстраннай і неадкладнай дапамогі ў звычайны рэжым работы, — сказаў Дзмітрый Піневіч.

Нагадаем, акрамя Гарадской інфекцыйнай клінічнай бальніцы Мінска, пацыентаў з COVID-19 шпіталізуюць у 6-ю гарадскую клінічную бальніцу (тэрапеўтычны і траўматалагічны карпусы), 4-ю (тэрапеўтычны корпус), 10-ю і 3-ю бальніцы, Мінскі гарадскі клінічны анкалагічны дыспансер (2 корпусы), Гарадскую гінекалагічную бальніцу.

Таксама пацыентаў, што ўжо перанеслі пнеўманію, якія маюць патрэбу ў далечванні і рэабілітацыі, накіроўваюць у 11-ю гарадскую клінічную бальніцу, Рэспубліканскую клінічную бальніцу медыцынскай рэабілітацыі "Аксакаўшчына" і Рэспубліканскі шпіталь інвалідаў ВАВ імя П. М. Машэрава.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.