Мы выратаваныя? Што за лекі навукоўцы знайшлі ад COVID-19

Даследаванні прэпарату, на добры лад, павінны працягвацца. Але праз экстранную патрэбу ў леках кампанія Merck, якая плануе іх выпуск, заявіла пра досыць пераканаўчыя доказы дзеяння малнупіравіру. Фірма падала заяўку ў амерыканскі наглядны орган FDA (Упраўленне па санітарным наглядзе за якасцю харчовых прадуктаў і медыкаментаў) на дазвол выкарыстання яго ў экстранных выпадках. FDA прыме рашэнне ўжо 30 кастрычніка.

У выпадку атрымання ўхвалення малнупіравір пачнуць выкарыстоўваць у ЗША, паралельна працягнуцца і яго даследаванні. У тым ліку (што важна) па магчымых пабочных эфектах і наступствах.

Вывучаюць малнупіравір не толькі амерыканцы. Напрыклад, індыйская Hetero Labs у папярэдняй справаздачы (*) паведамляе, што сярод хворых на COVID-19 у лёгкай форме сярод тых, хто прымаў прэпарат, былі шпіталізаваныя 1,6%, а сярод тых, хто прымаў плацэба, — 6,2%.
 

І што, мы выратаваныя?

Хоць даступная інфармацыя па малнупіравіры аптымістычная, занадта моцна спадзявацца на яго не варта.

Важна разумець, што ў прынцыпе распрацоўка супрацьвірусных прэпаратаў — вельмі складаная справа. Большасць "супрацьвірусных", якія вы можаце купіць у беларускай аптэцы, не маюць даказанай эфектыўнасці і ўжываюцца толькі ў постсавецкіх краінах — тыя ж уміфенавір ("Арпетол") і "Кагацэл".

Нават калі малнупіравір па выніках усіх неабходных выпрабаванняў дакажа сваю эфектыўнасць і бяспеку, зніжэнне рызыкі шпіталізацыі і смерці ад яго далёкае ад абсалюту. І, што важна, прымяненне гэтага прэпарату не выключае неабходнасці вакцынацыі.

У вас можа паўстаць пытанне: навошта вакцынавацца, калі ўсё роўна можна захварэць і потым прымаць лекі. Возьмем прыклад з грыпам: вакцыны ад яго таксама не выключаюць магчымасці заражэння, але моцна яе зніжаюць. Вакцынаваны таксама можа заразіцца і потым будзе вымушаны лячыцца. Аднак прагнозы ў такім выпадку будуць прыкметна лепшыя.
 

Ці дастанецца Беларусі?

Шэраг краін ужо заявілі пра планы закупкі малнупіравіру ў выпадку яго ўхвалення. Напрыклад, у іх ліку Новая Зеландыя, Аўстралія, Паўднёвая Карэя і Вялікабрытанія. Па досведзе прымянення вакцын мы памятаем, што спачатку прэпараты "раскупляюць" багатыя краіны, а ў бедныя яны трапляюць пазней.

Нядаўна фонд Гейтсаў заявіў пра намер вылучыць 120 мільёнаў долараў на тое, каб краіны з нізкім даходам маглі закупіць малнупіравір у выпадку ўхвалення. Праўда, Беларусь лічыцца краінай з сярэднім даходам, таму нам наўрад ці дапамогуць.