На БТ паказалі апытанне пра праграму развіцця краіны: простых беларусаў там няма

Першым — пераважна пра адукацыю — гаворыць супрацоўнік Гомельскага ўніверсітэта Андрэй Вялікі. Падчас вучобы ён быў сакратаром "ячэйкі" БРСМ, а цяпер знаходзіцца ў кадравым рэзерве Гомельскага аблвыканкама.

Другой — пра падтрымку нараджальнасці — гаворыць, мяркуючы па ўсім, "Місіс Беларусь — 2014" Юлія Перагудава. Яна нярэдка ўдзельнічае ў афіцыйных мерапрыемствах у Гомелі. Што праўда, у сувязях з праўладнымі арганізацыямі не заўважаная і актыўна займаецца дабрачыннасцю. Аднак таксама не самая шараговая ўдзельніца апытання.

Нарэшце, пра інавацыі актыўна разважае Уладзіслаў Волчак — студэнт Гомельскага медуніверсітэта. А яшчэ — кіраўнік камісіі Моладзевага парламента па ахове здароўя, спорце і турызме. Вядома ж, сябра БРСМ і стыпендыят Лукашэнкі.

Зразумела, што гэтым людзям далёка да знакамітай Юліі Арцюх, якая выступае і як жонка афіцэра, і як тэлевядоўца, і як шматдзетная маці, і як кіраўніца аб'яднання. Але метады дзяржТБ відавочныя.