Нападніка на ГЦ “Еўропа” падазраюць у забойстве пры абцяжарваючых абставінах
Нападніка на гандлёвы цэнтр “Еўропа” ў Мінску падазраюць у забойстве пры абцяжарваючых абставінах. У дачыненні маладога чалавека 1998 года нараджэння, якому яшчэ не споўнілася 18 гадоў, распачатая крымінальная справа паводле ч.2 арт.139 КК. З ім працуюць следчыя, таксама вядзецца ацэнка яго псіхічнага стану, паведамляе прэс-служба Следчага камітэта.
Следства папярэдне высветліла, што 8 кастрычніка каля 17.30 малады чалавек зайшоў у гандлёвы цэнтр з чахлом ад музычнага інструмента і бензапілой. Гэтай бензапілой ён нанес цялесныя пашкоджанні жанчыне 1973 года нараджэння, якая загінула на месцы здарэння. Затым ён дастаў з чахла сякеру і напаў на яшчэ адну жанчыну, 1970 года нараджэння. Яна шпіталізаваная і атрымлівае неабходную медыцынскую дапамогу.
Падазраванага хутка затрымалі супрацоўнікі міліцыі пры дапамозе работнікаў гандлёвага цэнтра.
Цяпер Следчы камітэт сумесна з супрацоўнікамі ГУУС Мінгарвыканкама і Дзяржаўнага камітэта судовых экспертыз праводзяць агляд месца здарэння. Вынятыя запісы камер відэаназірання, на якіх зафіксаваныя супрацьпраўныя дзеянні.
Старшыня Следчага камітэта Іван Наскевіч узяў расследаванне крымінальнай справы пад асабісты кантроль.
