Нелегалы змянілі тактыку пры пераходзе літоўска-беларускай мяжы
З верасня на мяжы Літвы з Беларуссю былі развернутыя 7 тысяч чалавек / Ілюстрацыйнае фота Reuters
Мігранты, якія спрабуюць перайсці дзяржмяжу Літвы на ўчастку з Беларуссю, цяпер робяць гэта невялікімі групамі па тры-пяць чалавек, паведаміў кіраўнік Службы аховы дзяржмяжы Літвы Рустамас Любаевас у інтэрв'ю тэлеканалу LRT у панядзелак.
Па словах кіраўніка Службы аховы, новая тактыка нелегалаў ускладняе як выяўленне такіх груп, так і іх фіксацыю і затрыманне. Аднак літоўскім памежнікам удаецца затрымліваць гэтых людзей. Любаевас таксама адзначыў, што нелегалаў выштурхваюць на тэрыторыю Літвы прадстаўнікі беларускіх сілавых структур.
За мінулыя суткі ў Літву з Беларусі спрабавалі трапіць 70 нелегальных мігрантаў. Усяго ў 2021 годзе ў Літву праніклі больш за 4 тысячы нелегалаў, з верасня на літоўска-беларускай мяжы былі развернутыя 7 тысяч чалавек.
Як паведамляла Еўрарадыё, Літва не бачыць магчымасці для перамоваў з Беларуссю аб урэгуляванні міграцыйнага крызісу. Пра гэта заявіла міністр унутраных спраў рэспублікі Агне Білатайтэ. Па яе словах, з Мінскам цяпер магчымыя толькі тэхнічныя кансультацыі ў рамках вырашэння гуманітарнага крызісу.
