Новым лідарам АГП стаў Васіль Палякоў
Новым лідарам Аб’яднанай грамадзянскай партыі стаў Васіль Палякоў — за яго кандыдатуру прагаласавалі ўдзельнікі з’езду арганізацыі, які праходзіў 8 ліпеня ў Мінску. Як паведамляе Радыё Свабода, усяго прапанавалі сем кандыдатураў: Васіль Палякоў, Мікалай Казлоў, Генадзь Ананьеў, Людміла Гразнова, Аляксандр Дабравольскі, Анатоль Паўлаў, Анатоль Лябедзька. Апошняга вылучылі насуперак яго жаданню — на самым пачатку з’езда былы старшыня сказаў, што хоча пакінуць гэтую пасаду і не стане ўдзельнічаць у новых выбарах кіраўніцтва.
Чатыры чалавекі ўзялі самаадвод — гэта Лябедзька, Ананьеў, Дабравольскі і Паўлаў. Тады з’явіўся яшчэ адзін прэтэндэнт — Максім Жарноўскі з Горак, які вылучыў самога сябе. Такім чынам, дэлегаты маглі выбіраць з чатырох кандыдатураў — Казлоў, Гразнова, Жарноўскі і Палякоў.
За Палякова прагаласавалі 72 дэлегаты з 104 прысутных. Раней ён займаў пасаду намесніка старшыні партыі.
Васілю Палякову 49 гадоў, ён жыве ў Гомелі. Паводле адукацыі палітолаг, займаецца каардынаваннем праваабарончых праграмаў.
