Палітзняволеную, экс-супрацоўніцу пракуратуры асудзілі на 6 гадоў калоніі
Наталля Лашч / t.me/viasna96/
Палітзняволеную, экс-супрацоўніцу пракуратуры Наталлю Лашч асудзілі на 6 гадоў калоніі агульнага рэжыму, паведамляюць праваабаронцы. Яе прызналі вінаватай у "незаконным зборы і распаўсюдзе інфармацыі аб прыватным жыцці" і "распальванні іншай сацыяльнай варожасці". За "зліў" інфармацыі ў "Чорную кнігу Беларусі".
Крымінальную справу разглядаў Мінскі абласны суд (суддзя — Анатоль Дабрадзей). Прысуд быў агучаны ў пачатку вясны, але пра яго стала вядома толькі цяпер.
Наталлі Лашч 30 гадоў. Яна — юрыстка 2 класа, былая супрацоўніца пракуратуры Фрунзенскага раёна Мінска, некаторы час працавала ў адной з IT-кампаній.
Пра затрыманне Наталлі Лашч стала вядома ў жніўні 2022-га. Сцвярджалася, што яна "незаконна распаўсюджвала інфармацыю пра прыватнае жыццё пракурорскіх работнікаў [Фрунзенскага раёна] і іх персанальныя даныя". На відэа сілавікоў жанчына казала, што ў жніўні 2020-га ўдзельнічала ў масавых акцыях пратэсту ў Мінску.
Неўзабаве палітзняволеная пачне адбываць тэрмін у гомельскай жаночай калоніі.
