Памочнік Лукашэнкі: Дастойны заробак для беларусаў — 3000 долараў

Адказваючы на пытанне дэкана факультэта міжнародных адносін БДУ аб тым, колькі трэба грошай для шчасця і які рацыянальны дастатак для Беларусі, памочнік кіраўніка дзяржавы па эканамічных пытаннях Кірыл Руды зазначыў, што ўзровень зарплаты неабходна параўноўваць з маштабам цэн.

"Калі мы гаворым аб прадуктах харчавання, спажывецкім кошыку, рэчах, якія мы хочам купіць, то зарплата ў раёне 3000 долараў — дастойная зарплата… зараз скажу каго", — задумаўся Кірыл Руды. Рэагуючы на смех у зале і звяртаючыся да прысутнага на сустрэчы рэктара БДУ Сяргея Абламейкі, памочнік прэзідэнта дадаў: "Мне здаецца, Сяргею Уладзіміравічу, як рэктару і як акадэміку, гэтага мала".

Адказваючы на пытанні студэнтаў, Кірыл Руды таксама зазначыў, што пасля пераходу з бізнесу на дзяржслужбу яго заработная плата знізілася ў разы. У сувязі з гэтым ён успомніў эпізод падчас адной з нарад, якая прайшла праз 2-3 месяцы пасля яго прыходу на пасаду памочніка кіраўніка дзяржавы.

"Прэзідэнт мяне падняў і сказаў: У нас ёсць малады чалавек, які працаваў у бізнесе, з'ехаў з глузду і прыйшоў да нас. Чаго вы да нас прыйшлі? Я адказаў: Вы ведаеце, цікава. Так, у зарплаце я страціў, груба кажучы, у пяць разоў, але затое мне цікава гэтым займацца", — падкрэсліў Кірыл Руды.

Кірыл Руды быў прызначаны памочнікам прэзідэнта па эканамічных пытаннях летам 2013 года. Да прызначэння займаў пасаду намесніка генеральнага дырэктара ТАА "Бел Хуавэй Тэхналаджыс", інфармуе БелаПАН.

У жніўні 2014 года сярэдняя зарплата ў Беларусі склала 6,36 млн рублёў. Аднак статыстыка сведчыць, што заробак меншы за 5 млн рублёў у жніўні атрымлівалі амаль 40% работнікаў.

Фота — Reuters