Перамогу ЦСКА над "Рэалам" Віктар Ганчарэнка прысвяціў Анатолю Капскаму
Хатнюю перамогу маскоўскага ЦСКА над мадрыдскім "Рэалам" у другім туры групавога этапа футбольнай Лігі чэмпіёнаў Віктар Ганчарэнка прысвяціў старшыні праўлення ФК БАТЭ Анатолю Капскаму, які памёр у верасні.
Матч адбыўся ў "Лужніках" 2 кастрычніка і скончыўся з лікам 1:0 на карысць гаспадароў. Адзіны гол у гульні на 2-й хвіліне сустрэчы забіў харвацкі легіянер ЦСКА Нікола Влашыч.
"Нягледзячы на тое што ў мяне добры настрой, хацеў бы прысвяціць перамогу майму сябру, другому бацьку Анатолю Капскаму, які нядаўна пайшоў з жыцця. Для мяне гэта вялікая страта. Пасля кожнай гульні ён мне тэлефанаваў, віншаваў. Сёння б ён таксама парадаваўся гэтай выдатнай перамозе", — цытуе словы Ганчарэнкі прэс-служба ЦСКА.
Як вядома, Віктар Ганчарэнка шмат гадоў быў галоўным трэнерам БАТЭ.
У іншых матчах аўторка "Баварыя" згуляла ўнічыю з "Аяксам" — 1:1, "Бенфіка" святкавала перамогу над АЕК — 3:2. Сустрэча "Ліёна" і "Шахцёра" завяршылася з лікам 2:2, "Рома" разграміла "Вікторыю" — 5:0, у сустрэчы "Манчэстар Юнайтэд" і "Валенсіі" не ўдалося адкрыць лік — 0:0. "Ювентус" перамог "Янг Бойз" з лікам 3:0, а "Манчэстар Сіці" выйграў у "Хафенхайма" — 2:1.
