Прэс-сакратар БПЦ: "Д'яблы вельмі баяцца знаку Крыжа Гасподняга"
Прэс-сакратар Беларускай Праваслаўнай Царквы, протаіерэй Сяргей Лепін пракаментаваў учорашнія падзеі ў Курапатах, дзе ўлады арганізавалі знос дзясяткаў крыжоў. "Хай уваскрэсне Бог", — назваў ён эмацыйны тэкст, апублікаваны ў ЖЖ.
"Ва ўрочышчы Курапаты, на месцы масавых рэпрэсій сёння знеслі 70 крыжоў, — піша протаіерэй Лепін. — А як праходзіць Крыжапаклонны тыдзень у вашай краіне?
"Што адбываецца?" — многіх хвалявала гэтае пытанне, і паверыць у рэальнасць таго, што адбываецца, было цяжка. Прэс-сакратарка прэзідэнта пазней патлумачыла: "Чытайце прэзідэнта!.. кіраўнік дзяржавы абяцаў, што ў Курапатах будзе наведзены парадак, даручэнне заняцца гэтым было дадзена адпаведным ведамствам. Гэта месца трэба добраўпарадкаваць". Абавязкова падтрымліваю прэзідэнта: трэба навесці парадак у Курапатах! Але вось метады мясцовых дзяржыморд і прышыбеевых — не падтрымліваю.
Па стратэгіі таксама ёсць пытанні, і самае галоўнае: "Якая яна, гэтая стратэгія?". Дай Бог, каб потым, зірнуўшы на вынік добраўпарадкавання, мы сказалі "Ваў!" — кшталту, як кажа мой сябар-мастак, "дурням палову працы не паказваюць"…
А яшчэ мяне спрабаваў супакоіць адзін добры чалавек: маўляў, крыжы ўсталяваныя былі без узгадненняў апазіцыянерамі, да таго ж яшчэ і пратэстантамі. Ага, вось яно што…
Апазіцыя, якая парадкуе помнікі культуры, а не будуе барыкады, і заклікае запаліць памінальныя свечкі на могілках, а не шыны на плошчы… Карацей, у нашай улады павінна быць шмат зайздроснікаў. Некаторыя б кіраўнікі ў такой сітуацыі з радасцю б самі бярвенне падвозілі і адкрывалі б усе новыя і новыя месцы масавых пахаванняў…
І пяцідзесятнікі, якія не цураюцца крыжоў, а самі ўсталёўваюць крыжы і, як спаведнікі, церпяць за гэта… Нібы назіраеш рэлігійную эвалюцыю ў рэальным часе! Калі ў вашай царкве не шануюць крыж, значыць, яна проста з'явілася пазаўчора, ніяк не ўкаранёна ў гісторыі, ды і проста пакуль што яго не заслужыла — магчыма, у яе яшчэ ўсё наперадзе…
Цікава, а на Грабарцы — усе крыжы узгоднены з уладамі, ці ёсць парачка няўзгодненых? Эххх.
Сябры! Засцерагайце сваё сэрца ад зла. Шанаваць Крыж — гэта не проста злучыць адну палку з іншай. І, тым больш, не проста ненавідзець тых, хто асмеліцца раз'яднаць гэтыя палкі. Гэта значыць укрыжавацца разам з Хрыстом і паўстаць з мёртвых разам з Ім. Як Ён: "Зразумець і дараваць". Ці проста адразу дараваць — бо наўрад ці зразумееш некаторыя рэчы ў некаторыя выпадках…
І памятайце: "Д'яблы вельмі баяцца знаку Крыжа Гасподняга, бо на ім Збаўца выкрыў і выставіў іх на ганьбу". Хоць спачатку дэманы думалі, што гэта яны выставілі Госпада…".
