Еўрапейскія дыпламаты напярэдадні Дзядоў наведалі Курапаты
Дыпламаты ўшанавалі памяць ахвяраў у Курапатах / x.com/AstaAndr
Напярэдадні Дзядоў еўрапейскія дыпламаты наведалі Курапаты — месца масавых расстрэлаў падчас сталінскіх рэпрэсій.
Дыпрадстаўнікі заходніх краін традыцыйна штогод наведваюць Курапаты на Дзяды.
На пачатку 90-х Дзяды былі афіцыйным дзяржаўным святам, у гэты дзень быў выходны. Пасля прыходу да ўлады Лукашэнкі гэты дзень страціў афіцыйны статус. Аднак апазіцыя штогод ладзіла памінальныя акцыі. У Мінску да 2020 года адбывалася шэсце да Курапатаў.
Да высновы, што ў Курапатах пахаваныя ахвяры сталінскіх рэпрэсій, прыйшла пракуратура, якая правяла расследаванне яшчэ ў савецкі час. Тым не менш цяпер прапагандысты ўсё гучней заяўляюць, быццам там пахаваныя ахвяры гітлераўцаў.
У 2019-м улады знеслі частку крыжоў народнага мемарыялу, заявіўшы, што займаюцца ўпарадкаваннем. Гэта выклікала шматлікія пратэсты. Спыніць крыжалом заклікаў тагачасны мітрапаліт Мінска-Магілёўскі, арцыбіскуп Тадэвуш Кандрусевіч.
"Напярэдадні Дня памяці продкаў "Дзяды", у адпаведнасці з традыцыяй, еўрапейскія дыпламаты прыйшлі да народнага мемарыяла Курапаты, каб ушанаваць памяць незлічоных жыццяў і невымерных талентаў, якія загінулі ў выніку таталітарызму", — напісала прадстаўніца Літвы Астра Андрыяўскене ў сваім акаўнце ў сацсетцы Х.
