Рабілі "ямачны рамонт", а ў выніку разбурылі будынак, загінуў чалавек

У Навагрудскім раёне смяротна траўмаваны работнік сельгаспрадпрыемства. Як паведамляе Следчы камітэт, усё пачалося з так званага "ямачнага рамонту". 27 верасня некалькі працаўнікоў праводзілі яго ў кароўніку. Адзін з мужчын знаходзіўся ў кузаве аўтамабіля, адкуль і скідаў асфальт. У нейкі момант, калі кіроўцы не было ў кабіне, МАЗ пачаў самаадвольны рух наперад. У выніку борт грузавіка зачапіў вароты і сцяну будынка, якая стала разбурацца. Кавалкі сцяны ўпалі на працаўніка, які быў у кузаве, ён атрымаў цяжкія траўмы. Лекары выратаваць яго не змаглі.

У дачыненні да 50-гадовага кіроўцы распачатая крымінальная справа па артыкуле "прычыненне смерці па неасцярожнасці".