Дзе патусіць на выхадных? Раіць Алег Ціханаў

130321_malina_afisha.mp3

На мінулых выхадных цыклон “Хавер” крыху сапсаваў адпачынак беларусаў. Некаторыя мерапрыемствы адмяніліся, на пэўныя канцэрты не даехалі музыкі і амаль паўсюдна не хапала наведвальнікаў. Надыходзячы ўік-энд абяцае быць больш лагодным па надвор’і. Адпаведна, магчымасці для тусовак і адпачынку самыя шырокія.

Дырэктар гурта Zorge, прадзюсар шматлікіх фестываляў (у тым ліку Jazz Koktebel) Алег Ціханаў прызнаецца, што любіць хадзіць на абсалютна розныя імпрэзы, але больш па запрашэннях. На бліжэйшых выхадных Алег не знаходзіць нічога выбітнага, але сёе-тое наведаць хацеў бы.

“Хачу ў пятніцу пайсці на фестываль “Бульбокс”, бо там граюць “Дай Дарогу!”, якія на “Даём рады!” мне спадабаліся. Я б яшчэ раз іх паслухаў і паразмаўляў з імі, можа ў нас што-небудзь атрымалася б. А яшчэ ў той жа час у Re:Public будзе Сяргей Табачнікаў. Для мяне абсалютна незразумелая асоба, але ён быў на маім канцэрце ў “Чердачке”, і народ мэтанакіравана ішоў паглядзець на віртуознасць яго ігры. Можна пайсці туды, а можна сюды, але я б пайшоў на “Бульбокс” у “Центр”.

На суботу Алег таксама выбірае два канцэрты: Jane Air у Re:Public ды "Гуканне вясны" ў Вязынцы. Любоў да фальклору пераважае: Ціханаў паедзе на радзіму Янкі Купалы. Там жа сярод іншых Guda спяваць будзе!

“У к/з “Мінск” будуць “Канскія львы”, — пераходзіць да “выхаднога” кіно Алег. — Напэўна, там будзе папса-папсой. Усе ўсё ўжо бачылі, але я б схадзіў. Калі глядзіш гэта ўсё з тысячай людзей, то гэта цікава, можна пасмяяцца, адзін дома ж звычайна не смяешся! Кіно мне параілі “Операция Арго”, сказалі абавязкова трэба паглядзець, бо ён выйграў “Оскар” сёлета. Я, на жаль, не паспеў у гэтым годзе даляцець да “Оскара”, да таго ж мяне не запрашалі (смяецца). Не ведаю, хто перамог, але ўсім трэба ісці на “Арго”.

Рэпертуару беларускіх тэатраў Алег не ведае і ў прынцыпе не вельмі цікавіцца гэтым відам мастацтва. Але як цікавы варыянт адзначыў пастаноўку “Дзяды” паводле Адама Міцкевіча ў Беларускім дзяржаўным тэатры лялек.

Калі няма жадання хадзіць па людных месцах, дык Алег Ціханаў прапануе першае ў Беларусі антыкафэ "Дом Фишера", прычым у любы дзень.

“Мне вельмі падабаецца гэтае месца. Там праходзяць невялічкія мерапрыемствы, і ўсе яны добрыя. І каштуе там усяго 18 тысяч гадзіна, і за гэтыя грошы: безліч кавы, гарбаты, розных гульняў… Гэта месца, куды прыемна хадзіць проста так!”.

Дарэчы, у нядзелю ў "Доме Фишера" Speed-meeting, так што самотным слухачам Еўрарадыё і сапраўды варта было б туды зазірнуць замест таго, каб разглядаць завею з падваконня.

Нават дзіўна, але пошук нецікавых мерапрыемстваў у Алега зацягваецца. У выніку ўвесь негатыў прымае на сябе канцэрт Дашы Суворавай у “Мулен Руж”. Спявачка прадзюсару абсалютна невядомая! Пакуль цягнуцца разважанні пра прычыны з’яўлення Дашы Суворавай у шоў-бізе, мы заўважаем адзнаку, што мерапрыемства адмененае. “Народ сам вырашыў лёс канцэрта!”, — з усмешкай адзначае Алег і пераключаецца на трыб’ют гурта Coldplay ў Doodah King Bar.

“Чаму людзі не жадаюць выконваць сваю музыку, — абураецца прадзюсар. — Мне падаецца, што ўсе такія неафіцыйныя трыб’юты — гэта проста кан'юнктура на чужым імені. Напэўна, прыкольна схадзіць, піва папіць…”

Узгадвае Алег і пра “Дудуткі” з іх “Гуканнем вясны”. На мінулым тыдні паехаць туды з сям’ёй раіў Аляксандр Кулінковіч, але мерапрыемства перанеслі праз кепскае надвор’е. А меркаванні двух экспертаў — гэта ўжо нагода звярнуць увагу!