Інтарэсы Швецыі ў Беларусі будзе прадстаўляць Эстонія
Урад Эстоніі ў чацвер абмяркуе законапраект, згодна з якім Талін будзе прадстаўляць інтарэсы Швецыі ў нашай краіне ў візавых пытаннях.
МЗС Эстоніі прадставіць ураду адпаведнае пагадненне са Швецыяй, якое заменіць дакумент, заключаны ў студзені летась. Згодна з дзеючым пагадненнем, Швецыя прадстаўляе Эстонію ў Гаване і Прэторыі.
Пагадненне павінна набыць моц 20 жніўня, паведамляе Радыё Свабода.
Нагадаем, на пачатку жніўня з Беларусі з'ехаў амбасадар Швецыі Стэфан Эрыксан, якому ўлады Беларусі адмовілі ў працягу акрэдытацыі. 8 жніўня МЗС Беларусі абвясціў, што адклікае ўсіх супрацоўнікаў беларускага пасольства ў Стакгольме. Шведскаму боку рэкамендавана прыняць аналагічныя меры і адклікаць усіх сваіх дыпламатаў да 30 жніўня.
