Польшча можа ўвесці санкцыі супраць беларускіх прадпрыемстваў
Польскія санкцыі могуць закрануць тыя фірмы, якія фінансуюць рэжым Аляксандра Лукашэнкі.
Пра гэта, па звестках БелаПАН, заявіў 20 траўня міністр замежных спраў Польшчы Радаслаў Сікорскі на прэс-канферэнцыі ў Быдгашчы. Там праходзіць сустрэча кіраўнікоў МЗС краін — удзельніц Веймарскага трыкутніка — Польшчы, Францыі ды Нямеччыны.
Па словах Сікорскага, плануецца павялічваць ціск на беларускі рэжым, пакуль ён не зменіць курс.
У рамках сустрэчы Веймарскага трыкутніка бакі абмеркавалі сітуацыю ў Беларусі. Яны заявілі, што закрануць яе на бліжэйшай сустрэчы кіраўнікоў МЗС краін Еўрасаюза, якая адбудзецца 23 траўня.
Нагадаем, што ў меркаваным "эканамічным чорным спісе" Еўрасаюза называліся такія прадпрыемствы, як канцэрн "Белнафтахім", група кампаній "Трайпл", кампанія "Белтэхэкспарт" і "Беларуськалій".
