У Беластоку адбылася прэзентацыя кнігі пра беларуска-польскае памежжа

Кніга “Белы конь” выйшла раней па-беларуску, а цяпер і па-польску. Аўтар яе 52-гадовы Міхась Андрасюк. Ён  піша на абедзвюх мовах, але “па-свойму”,  трымаючыся моўных традыцый людзей,  якія жывуць паабапал мяжы.  Па-свойму яны ў свой час абышліся і з мяжой.  Гісторык Яўген Вапа пацвярджае:

“Мясцовыя гэта ніколі не гаварылі, гэта было народнай таямніцай. Калі пасля вайны ўсталёўвалі мяжу, і ім сказалі, што будуць жыць у Савецкім Саюзе, дык  яны гэтых памежнікаў, капітанаў, сяржантаў усяляк паілі гарэлкай, сала насілі, абы толькі тыя адсунулі мяжу крыху далей”.

Пасля фэсту з самагонкай, мёдам і салам цалкам вынеслі за тэрыторыю СССР родную вёску Міхася Андрасюка Вялікая Апака.

Старыя беларусы ў Польшчы амаль не баяцца больш  распавядаць пра тыя часы, і можна пачуць нечаканыя версіі,  сказаў Яўген Вапа.