Салігорскі фермер знарок збанкрутаваў сваё прадпрыемства (відэа)

Фінансавай міліцыі ўпершыню за некалькі гадоў удалося даказаць выпадак крымінальнага банкруцтва, паведамляе tut.by са спасылкай на тэлеканал "Беларусь 1".

Салігорскі фермер спецыяльна банкрутаваў сваё прадпрыемства. Ён завінаваціўся партнёрам і дзяржаве 1 мільярд 800 мільёнаў рублёў. У фермера было дастаткова сродкаў, каб разлічыцца за пазыкі. Але прадаваць маёмасць для гэтага ён не хацеў. Таму мужчына вырашыў збанкрутаваць адну фірму, а ўсе грошы перавесці на рахунак іншай. Частку прадукцыі, як высветлілі праваахоўныя органы, фермер стаў прадаваць за наяўны разлік без бухгалтарскіх дакументаў.

Акрамя таго, як раз падчас цяжбы ў бізнэсоўца нечакана згарэла пільня. Даказаць наўмысны падпал не ўдалося, аднак праваахоўнікам і так хапіла доказаў супраць прадпрымальніка.

На салігорца пачалі крымінальную справу па двух артыкулах — "Наўмыснае банкруцтва" і "Ухіленне ад выплаты крэдыторскай запазычанасці".