Што агульнага ў беларускай апазіцыі і амерыканскага Кангрэса? — #ІхНоравы

04/10/2023 - 17:50

"Іх Норавы" / @rubanau_collage

Думаеце, звады і сваркі — унікальная рыса беларускай апазіцыі? Тады раскажам вам апошнія навіны з Белага дома.

Гэта рэгулярны агляд сусветных навін ад Еўрарадыё.

Не толькі беларуская апазіцыя ўмее дзяліцца

Спікера Палаты прадстаўнікоў ЗША зрынулі. Здавалася б — і што такога знакавага ў гэтай навіне? Скажам інакш: спікера зрынулі ўпершыню ў гісторыі!

Памятаеце, як на мінулым тыдні рэспубліканцы з дэмакратамі не маглі дамовіцца па бюджэце, бо група радыкальных правых патрабавала спыніць фінансавую падтрымку Украіны? Каб не дапусціць прыпынення фінансавання ўрадавых устаноў, рэспубліканцы і дэмакраты пайшлі на здзелку і прынялі часовы бюджэт — крыху большы, чым на месяц. Фінансавання Украіны ў ім (пакуль) няма.

Спікер Кевін Макарці спрабаваў спрыяць гэтай часовай угодзе, каб не дапусціць шатдаўна. Шатдаўн — гэта такая непрыемная сітуацыя, калі работнікі наогул усіх дзяржустаноў не ходзяць на працу, бо пакуль не прыняты бюджэт, ім не могуць плаціць заробак.

Але потым радыкальна настроеныя рэспубліканцы абвінавацілі спікера ў тым, што ён нібыта заключыў сакрэтнае пагадненне з Белым домам, каб той мог працягваць падтрымліваць Украіну ў вайне. Сам Макарці гэта адмаўляе. Ён кажа, што такая сітуацыя — вынік асабістых супярэчнасцяў з некаторымі калегамі па партыі, і нічога агульнага гэта з дзяржвыдаткамі не мае.

Цікава, дарэчы, як Макарці зрабіўся спікерам. У студзені мінулага года Кангрэс ніяк не мог вызначыцца з тым, хто ж яго ўзначаліць. Прайшло 15 знясільвальных тураў галасавання, але група радыкалаў усё адмаўлялася падтрымаць Макарці. У выніку, каб прыцягнуць на свой бок гэтых прыхільнікаў жорсткай лініі, Макарці пагадзіўся даць магчымасць сваім апанентам вылучыць прапанову аб яго адхіленні. У выніку яны гэтай магчымасцю і скарысталіся.

Экс-прэзідэнт Дональд Трамп у адказ на гэта сказаў, што партыя павінна "змагацца з радыкальнымі левымі дэмакратамі", а не адно з адным. Ну што, усё яшчэ думаеце, што сварыцца і раздзяляцца можа толькі беларуская апазіцыя?

Усё яшчэ не верыце ў змяненне клімату?

А вось Папа Францішак верыць. Ён крытыкуе сусветных лідараў, буйную прамысловасць, а яшчэ безадказны лад жыцця, які вядзе заходні чалавек.

Папа ўпершыню ў гісторыі звярнуўся з энцыклікай, цалкам прысвечанай пытанням клімату. Энцыкліка — гэта папскае пасланне па асноўных сацыяльна-палітычных і маральных пытаннях.

"Ніхто не можа ігнараваць той факт, што ў апошнія гады мы зрабіліся сведкамі экстрэмальных з'яў надвор'я, частых перыядаў анамальнай спёкі, засухі", — пералічвае Папа Францішак. Ды вы і самі ўсё гэта ведаеце, калі чыталі навіны хоць бы гэтым летам, праўда?

Папа звярнуў асаблівую ўвагу на тое, што багатыя развітыя краіны бяруць на сябе недастаткова адказнасці за змяненне клімату. Паводле яго слоў, выкіды на аднаго чалавека ў ЗША прыкладна ўдвая большыя, чым на аднаго чалавека, які жыве ў Кітаі. І прыкладна ў сем разоў большыя, чым у сярэднім у самых бедных краінах.

І згадаў бізнес і сусветных лідараў, якія ставяць у прыярытэт кароткатэрміновыя прыбыткі і выгады, а не дзеянні на перспектыву.

"На жаль, кліматычны крызіс — гэта не зусім тое пытанне, якое цікавіць вялікія эканамічныя дзяржавы, чый клопат палягае ў атрыманні як мага большага прыбытку пры мінімальных выдатках і ў самыя кароткія тэрміны", — кажа Папа.

Калі вы ўсё яшчэ лянуецеся раздзяляць смецце, бо вам не падабаецца Грэта Тунберг, можа, вам спадабаецца Папа Францішак?

Ты чараўнік, Гары

А экспарцёр добрых навін для гэтага агляду — Вялікабрытанія. Брытанец на імя Гары Потэр расказаў, як гэта — быць Гары Потэрам.

Гэты Гары нарадзіўся за паўгода да з'яўлення першай кнігі пра юнага чараўніка. Так што бацькі і не ўяўлялі, якое дзіўнае імя даюць сыну.

Першы заробак дзякуючы Потэру брытанец атрымаў яшчэ ў дзяцінстве, калі яго запрасілі паўдзельнічаць у нейкім японскім шоу (там ён якраз расказваў пра тое, як быць Гары Потэрам). На гэтым рэальны Потэр зарабіў крыху больш за 100 еўра.

А аднойчы ў аэрапорце яму ўдалося сфатаграфавацца са сваім "дзядзькам" — акцёрам Гэры Олдманам, які ў фільме мае ролю хроснага Гары Сірыуса Блэка. Праўда, Олдман спачатку не паверыў, што перад ім насамрэч Гары Потэр, — давялося паказваць пашпарт.

А аднойчы па дарозе ва ўніверсітэт малады чалавек сустрэў мінака, якога ніколі не бачыў раней. А той вазьмі ды і скажы:

— Ты чараўнік, Гары.

Адным словам, калі вырашыце назваць дзіця ў гонар персанажа кнігі, вы гарантуеце яму ну вельмі цікавае жыццё.

Лега-Джэк, знайдзіся!

І яшчэ адна добрая навіна ад брытанцаў. Па дарозе ў школу 10-гадовы Джэк згубіў сваю любімую цацку — міні-копію самога сябе на імя Лега-Джэк.

Ён намаляваў плакат, апісаў, як выглядала цацка, і паабяцаў узнагароду ў 2 фунты таму, хто верне Лега-Джэка. І гэта спрацавала!

Жыхароў раёна, дзе жыве Джэк, гэты плакат расчуліў. Яго распосцілі яго ў сацсетках, і нехта сапраўды наткнуўся на маленькую цацку. Хоць мама хлопчыка была ўпэўненая, што шанцаў няма і гэта ўсё адно што шукаць іголку ў стозе сена.

Той, хто знайшоў Лега-Джэка, атрымаў вялікую каробку шакаладных цукерак і вялікі дзякуй ад сапраўднага Джэка. Будзьце як Джэк — не верце дарослым, якія лічаць, што немагчыма занадта многае.