Што выгадней: купіць бульбу на рынку ці вырасціць самастойна

“Будзе каля 100 мяхоў бульбы, але гэта рознай: і дробнай, і вялікай, і сярэдняй. Адзін мех — прыкладна, 40 кілаграм. Зразумела, гэта ўсё вельмі дорага. Пасадзіць бульбу — 1-1,5 долара за сотку бярэ трактарыст — апрацаваць, зрабіць лункі, заараць. Далей яе абагнаць трэба, акрапіць, прапалоць ды выкапаць. А ўгнаенні — гэтага ж ніхто не лічыць. А часу колькі патрэбна!” — падлічвае Васіль.

Гаспадару прасцей, бо ў яго свой конь. З яго дапамогай можна заараць поле, апрацаваць яго, пасадзіць бульбу пад каня, абагнаць яе і узараць. Для тых, у каго каня няма, ёсць два выйсці: шукаць яго па вёсцы ці наймаць трактар з ужо названымі коштамі. Разлік за працу ды тэхніку — як дамовішся: хтосьці бярэ “пляшкай”, нехта грашыма. Падлічваем, што за 32 соткі трэба заплаціць 48 долараў трактарысту, каб падрыхтаваў поле для бульбы.

Пасадзіць бульбу — самая простая праца. Звычайна, пры вялікай кампаніі пасадзіць тыя 30 сотак — дзень-два працы. Потым яе трэба пабаранаваць, прапалоць, акрапіць ад фітафторы ды абагнаць. Зразумела, што ад такой працы садніць спіна, вельмі баляць рукі, а цела набывае такі загар, які не сыходзіць да наступнай пасадкі бульбы.

Карэспаднэнт Еўрарадыё можа не толькі рэпартажы пісаць, але і бульбу капаць 

Але ўраджай так сабе...

Васіль распавядае, што звычайна разам з сям’ёй выкопвае бульбу за тры тыдні. Спачатку узорваецца поле, а потым спецыяльным прыстасаваннем разграбаецца зямля. Бульбу збіраюць у тры кошыкі — асобна малую, сярэднюю ды вялікую. Калі памагатых няма, можна абысціся сваімі сіламі, а можна наняць людзей. Дадатковыя выдаткі да тых 48 долараў за пасадку бульбы. Калі няма “натуральных” і бясплатных угнаенняў, а таксама насення, то сюды дадайце грошы і на іх.

Здаваць цяпер бульбу, у сезон, не выгадна, бо вельмі нізкія кошты.  Вясной, калі кошт падымецца, ёсць верагоднасць, што можна зарабіць трохі болей.

“Дакладна не скажу, але цяпер прымаюць бульбу недзе па 2-3 тысячы. Але гэта трэба адборную, не дробную, трэба ж самую таварную прадаваць. У нас буханка хлеба каштуе 8,5-9 тысяч рублёў, дык мне трэба здаць тры-чатыры кілаграмы на тое, каб акупіць паўкіло таго хлеба? Не выгадна гэта”, — кажа гаспадар.

Са сваіх 32 сотак Васіль выкапаў каля 4000 кілаграм бульбы. На Камароўскім рынку у Мінску ў самы сезон бульба каштуе 5-6 тысяч за кілаграм.

За прылаўкам стаіць Ларыса Пятроўна. Кошты на яе бульбу, як і ва ўсіх на рынку. Пытаемся ў жанчыны, колькі каштуе вырасціць бульбу?

“Пасадзіць, абагнаць пяць разоў за сезон, выкапаць! Столькі працы! Пасадзіць адну сотку каштуе каля 35 тысяч у Мінскім раёне. Акрапіць — адна шкляначка атруты каштуе 35 тысяч. А выкапаць!”, — эмоцый Ларыса Пятроўна не хавае. Жанчына паўтарае, што пасадзіць ды сабраць ураджай нялёгка.

Падлічваем: Васіль вырасціў 4000 кілаграм бульбы, патраціў сілы і, калі б не было каня, то яшчэ амаль 500 тысяч на трактар. На мінскай Камароўцы бульба каштуе ў сярэднім 5,5 тысяч рублёў. Такім чынам, калі не вырошчваць самому, то ўвесь яго ўраджай можна купіць за 22 мільёны рублёў. Гэта, натуральна, калі вам столькі патрэбна.