Спартсменам з Расіі не месца на Алімпіядзе, заявіла ўкраінка Вольга Харлан
Вольга Харлан / FIE via Getty Images
Спартсменам з Расіі не месца на Алімпіядзе, заявіла ўкраінская фехтавальшчыца, адна з самых тытулаваных спартсменак Украіны Вольга Харлан. Яна абураная, што Міжнародны алімпійскі камітэт прыняў рашэнне дапусціць іх у нейтральным статусе. Пра беларускіх спартсменаў, якім МАК таксама дазволіў выступіць у Парыжы, Харлан не згадала.
"Абурае, што ўвесь свет назірае за вайной, большасць краін падтрымліваюць Украіну і дапамагаюць нам змагацца са злом. А МАК проста бярэ і дапускае гэта зло да Алімпійскіх гульняў", — піша яна. Вольга Харлан заклікае дамагацца скасавання "ганебнага рашэння".
Украіна, дарэчы, яшчэ не вырашыла, ці будзе ўдзельнічаць у Алімпіядзе ў Парыжы з-за допуску беларусаў і расіян.
На Алімпіяду змогуць паехаць спартсмены, якія прайшлі адбор у сваіх відах спорту. На даны момант кваліфікаваліся толькі 8 атлетаў з РФ і 3 — з РБ. А вось беларускіх і расійскіх лёгкаатлетаў у Парыжы не будзе.
